‘అనగనగా ఒక చిత్రం’ ఆడియో...

జె.ప్రభాకర్‌రెడ్డి దర్శకత్వంలో శివ, మేఘశ్రీ జంటగా నటిస్తున్న సినిమా అనగనగా ఒక చిత్రమ్. ఈ చిత్రాన్ని కొడాలి సుబ్బారావుతో నిర్మిస్తున్నారు. వినోద్ యాజమాన్య సంగీతం అందించిన  ఈ చిత్ర గీతాలను హైదరాబాద్‌లో విడుదల చేశారు. ఆడియో సీడీలను ప్రముఖ దర్శకుడు దాసరి నారాయణరావు ఆవిష్కరించారు. తొలి ప్రతిని రాష్ట్ర సినిమాటోగ్రఫీ శాఖ మంత్రి తలసాని శ్రీనివాసయాదవ్ స్వీకరించారు. ఈ సందర్భంగా దాసరి నారాయణరావు మాట్లాడుతూ పాటలు బాగున్నాయి. ఈ సినిమా విజయవంతమై యూనిట్ అందరికీ మంచి పేరుతెచ్చిపెట్టాలని కోరుకుంటున్నాను అన్నారు. తలసాని శ్రీనివాస్‌యాదవ్ మాట్లాడుతూ బాహుబలి, శ్రీమంతుడు చిత్రాలు తెలుగు ఇండస్ట్రీ సత్తాను నిరూపించాయి. అన్ని భాషల్లో పెద్ద విజయాన్ని నమోదు చేసుకున్నాయి.
పెద్ద సినిమాలతో పాటు చక్కటి కథాంశాలతో కూడిన చిన్న చిత్రాలు రూపొందించాలి. కొత్త కథానాయకులు పరిశ్రమకు పరిచయమవ్వాలి అని కోరారు. దర్శకుడు మాట్లాడుతూ ప్రేమకథకు థ్రిల్లింగ్ అంశాలను మేళవించి రూపొందిస్తున్న చిత్రమిది. రొటీన్‌కు భిన్నంగా సాగే ఈ సినిమాలో శివ నటన ఆకట్టుకుంటుంది. కథలోని కొత్తదనం ఇంటిల్లిపాదిని మెప్పిస్తుంది అని తెలిపారు. త్వరలో చిత్రాన్ని ప్రేక్షకుల ముందుకు తీసుకొచ్చేందుకు సన్నాహాలు చేస్తున్నామని హీరో శివ అన్నారు. ఈ కార్యక్రమంలో సి.కల్యాణ్, సుధీర్‌బాబు, ఆదిశేషగిరిరావు, మల్లిఖార్జునరావు తదితరులు పాల్గొన్నారు.