రాజుగారి పర్మినెంట్ హీరో....!

సాయిధరమ్ తేజ్ కు లక్కు బాగానే ఉన్నట్టుంది. లేకపోతే ఇలా ఇండస్ట్రీకి వచ్చాడో లేదో అప్పుడే ఏడు సినిమాల హీరో అయ్యాడు. మొదటి సినిమా హిట్ కొట్టాడు... రెండో సినిమా ఫట్ కొట్టినా... ఇప్పుడు విడుదల కాబోతున్న సుబ్రహ్మణ్యం ఫర్ సేల్ డైరెక్టర్, నిర్మాతలను బట్టి ఇది కూడా ఓ హిట్టే అని ఇప్పటికే అంచనాలు వేస్తున్నారు. సాయి ధరమ్ తేజ్ ఇప్పుడు వరుస ప్రాజెక్టులతో బిజీ అయ్యాడు. పిల్లా నువ్వులేని జీవితం, సుబ్రహ్మణ్యం ఫర్ సేల్, సుప్రీమ్, తిక్క, శతమానం భవతి, అనీల్ రావిపూడితో మరో సినిమా ఇవన్నీ ప్రస్తుతం చేస్తున్న సినిమాలు. వీటన్నిటికీ నిర్మాత దిల్ రాజు కావడం ప్రత్యేకంగా చెప్పుకోవాలి. రాజుగారికి ఈ హీరో బాగా నచ్చినట్టున్నాడు. టాలెంట్ ఓకే... కానీ నిర్మాతలకు నటులతో మెలిగే కంఫర్ట్స్ కూడా కొన్నింటాయి. వాటిని బట్టి కూడా వారితో సినిమా చేయడానికి ఇష్టపడుతుంటారు. ఈ నిర్మాతకు సాయితో అలాంటి బంధమే ఉండి ఉంటుంది. ఇదే విషయాన్ని ఆ మధ్య సాయి ధరమ్ తేజ్ అడిగితే ‘దిల్ రాజుగారు నా వద్దకు మంచి స్క్రిప్టుతో వచ్చారు. మంచి రెమ్యూనరేషన్ ఆఫర్ చేసారు. ఇంతకంటే నాకు కావాల్సింది ఏముంటుంది' అంటూ సమాధానం ఇచ్చాడట. అయితే మేనల్లుడు ఇపుడు ఒకే నిర్మాతతో కమిట్ అయినట్టే గతంలో నిర్మాత క్రాంతి కుమార్ తో చిరంజీవి ఐదు సినిమాలు చేశాడట. కానీ ఆ సినిమాలన్నీ వరుసగా చేయలేదు. మొత్తానికి మేనల్లుడికి అదృష్టం బాగానే ఉంది. లేకపోతే మరో రెండు సంవత్సరాల వరకూ సినిమాలకు వెతుక్కోవాల్సిన అవసరం లేదు కదా ఈ హీరోగారికి.