డాన్సర్ నుంచి సైకోగా మారిన హలీమ్ ఖాన్

టాలెంట్ ఉన్న అందరూ పైకి వస్తారని అనుకోడానికి లేదు... ఎప్పుడో... ఎక్కడో ఓ సినిమాలో క్లిక్ అయితే గానీ వారిని గుర్తించలేం.. హలీమ్ ఖాన్ స్వతహాగా కూచి పూడి డాన్సర్. దేశ విదేశాల్లో అనేక డాన్స్ ప్రొగ్రాములిచ్చి నాట్యం మీద తనకున్న అభిరుచిని నిరూపించుకున్నాడు. అయితే కొన్ని సినిమాల్లో చిన్న పాత్రల్లో కనిపించినా పెద్దగా పేరు తెచ్చుకోలేకపోయాడు. కానీ రవిబాబు తెరకెక్కించిన "నువ్విలా" చిత్రంలో గే క్యారెక్టర్ లో కామెడీని పండించిన హలీమ్ ఖాన్ కొందరు సినిమా వాళ్ళ దృష్టిలో పడ్డాడు. హలీమ్ కు నటనకంటే నాట్యమంటేనే ఇష్టమట.  అందుకే నాట్యానికి ప్రాధాన్యత ఇచ్చిన హలీమ్ నాట్య ప్రదర్శనలనే ఎక్కువ ఇష్టపడుతుంటాడు. "నువ్విలా" చిత్రంలో హలీమ్ హావభావాలను గమనించిన కొందరు దర్శకనిర్మాతలు హలీమ్ చేత తమ చిత్రంలో నటింపజేయాలని చూసినప్పటికీ, హలీమ్ ఖాన్ అప్పట్లో ఆఫర్లను తిరస్కరించాడు. ఇప్పుడు హలీమ్ "శ్రీ నిలయం" అనే చిత్రంలో తన నటనను మళ్ళీ ప్రేక్షకులకు చూపించాలనుకున్నాడు. థ్రిల్లర్ ఫార్మాట్ లో తెరకెక్కిన "శ్రీ నిలయం" చిత్రంలో హలీమ్ ఖాన్ ఓ "సైకో" క్యారెక్టర్ లో నటించాడు. లేడీ గెటప్ లో హలీమ్ ప్రదర్శించే విలనిజం అందరినీ ఆకట్టుకునేలా ఉందంటున్నారు. మరి డాన్సర్ గా మెప్పించే హలీమ్ సైకోగా ఎంత వరకు ఒప్పించగలిగాడనేది ఈ సినిమా చూస్తే గానీ అర్థం కాదు.