ఎన్టీఆర్ చేతుల మీదుగా ‘కుమారి’ టీజర్

విభిన్న చిత్రాల దర్శకుడిగా పేరున్న సుకుమార్ ఇప్పుడు నిర్మాతగా మారి ‘కుమారి 21 ఎఫ్’ సినిమా చేస్తున్న సంగతి అందరికీ తెలిసిందే. ఈ చిత్రానికి ఆయనే స్వయంగా కథ, స్క్రీన్ ప్లే, మాటలు కూడా అందిస్తున్నారు. రాజ్ తరుణ్ కథానాయకుడిగా నటిస్తుండగా హేభా పటేల్ కథానాయిక.  ఇటీవల విడుదలైన ఫస్ట్ లుక్ కూడా ప్రత్యేకంగా కనిపించి అందరినీ ఆకట్టుకుంది. పీఏ మోషన్ పిక్చర్స్ పతాకంపై సూర్య ప్రతాప్ పల్నాటి దర్శకత్వంలో, సుకుమార్ సమర్పణలో, విజయ ప్రసాద్ బండ్రెడ్డి, థామస్ రెడ్డి ఆదూరి సంయుక్తంగా నిర్మిస్తున్న ఈ చిత్రం షూటింగ్  పూర్తి చేసుకునే దశకు చేరుకుంది. ఈ చిత్రం గురించి సుకుమార్ మాట్లాడుతూ ‘ఇదొక వైవిధ్యమైన ప్రేమ కథా చిత్రం. నేటి యూత్ తో పాటు అన్ని వర్గాల వారిని అలరించే అంశాలు ఇందులో చాలా ఉంటాయి. దేవిశ్రీ ప్రసాద్ సాంగీతం, రత్నవేలు ఫొటో గ్రఫీ చిత్రానికి హైలైట్’ అన్నారు. 
అయితే ఈ చిత్రం టీజర్ అక్టోబర్ 2న జూనియర్ ఎన్టీఆర్ చేతుల మీదుగా విడుదల చేయబోతున్నట్టు తెలిపారు చిత్ర నిర్మాతలు. అక్టోబర్ లోనే ఆడియో ను కూడా విడుదల చేసి, అక్టోబర్ 30న చిత్రం విడుదల చేసేందుకు సన్నాహాలు చేస్తున్నారు. ఈ చిత్రంలో ఇంకా నోయల్; నవీన్, సుదర్శన్ రెడ్డి, భాను, హేమ, కమల్, తాగుబోతు రమేష్, జోగిబ్రదర్స్, సత్య, కృష్ణ తదితరులు నటిస్తున్నారు. సంగీతం: దేవిశ్రీ ప్రసాద్, సినిమాటోగ్రఫీ: రత్నవేలు, ఆర్ట్: బి.రామచంద్రసింగ్, ఎడిటర్: అమర్ రెడ్డి, ఫైట్స్: డ్రగాన్ ప్రకాష్, కొరియోగ్రఫీ: ప్రేమ్ రక్షిత్, శంకర్, నిక్సన్.