తీగలపల్లి శ్రీదేవి సమర్పణలో జషాంక్‌ హీరోగా, అజరుకుమార్‌ ప్రతినాయకుడి పాత్రలో నటిస్తున్న చిత్రం 'నా భూమి' టైటిల్‌ వీడియో సాంగ్‌ను స్పీకర్‌ మధుసూధనాచారి బుధవారం తన ఛాంబర్‌లో ఆవిష్కరించారు. ఈ సందర్భంగా స్పీకర్‌ మాట్లాడుతూ తొలితరం తెలంగాణలో వస్తున్న ''నా భూమి'' చిత్రం విజయవంతం కావాలని ఆకాంక్షించారు. అనంతరం చిత్ర దర్శకుడు కుమార్‌ఖన్నా మాట్లాడుతూ.. ప్రత్యేక రాష్ట్రం కోసం ప్రాణాలు అర్పించిన అమరులకు, అలాగే తెలంగాణలోని ప్రతిఒక్కరికీ ఈ పాటను అంకితమిస్తున్నట్లు తెలిపారు. గణతంత్ర దినోత్సవాన్ని పురస్కరించుకుని స్పీకర్‌ చేతుల మీదుగా ఈ పాటను ఆవిష్కరించడం ఆనందంగా ఉందన్నారు. ''నా భూమి'' టైటిల్‌ సాంగ్‌ను ప్రముఖ కవి, రచయిత నందిని సిద్ధారెడ్డి రచించగా దేశపతి శ్రీనివాసరావు ఆలపించారని చెప్పారు. అజరుకుమార్‌ మాట్లాడుతూ..ఇది తిరగబడ్డ బిడ్డ సినిమా అని, తొలితరం తెలంగాణలో వస్తున్న చిత్రం 'నా భూమి' అని చెప్పారు. ఇప్పటికే చిత్రంలోని పాటలు మార్కెట్‌లో హల్‌చల్‌ చేస్తున్నాయని అన్నారు. ఈ సినిమా అందరి మన్ననలు పొంది అఖండ విజయం సాధిస్తుందని తెలిపారు.
.jpg)
