నాని కల నెరవేరింది

ఏ నటులకైనా ఫేమస్ డైరెక్టర్ సినిమాల్లో పని చేయాలనే కోరిక ఉంటుంది. మన దక్షిణాదిన పేరున్న డైరెక్టర్లలో మణి రత్నం కూడా ఒకరు. ఆయన సినిమాల్లో పని చేయాలని చాలా మంది నటీనుటలకు కోరిక ఉంటుంది. అలాగే మన తెలుగులో సహజ నటుడిగా పేరుపొందిన నానికి కూడా ఆయన సినిమాల్లో చేయాలనే కోరిక ఎన్నాళ్ళుగానో ఉందట. ఇప్పటికే నాని చాలా సార్లు, మణిరత్నంతో ఓ సినిమా చేయాలని ఉందని తెలిపాడు. మణిరత్నం గత కొద్ది రోజులగా దుల్కర్ సల్మాన్ – కార్తీలతో ఓ మల్టీ స్టారర్ ప్రాజెక్ట్ ని సెట్స్ పైకి తీసుకెళ్ళాలి అనుకున్నాడు. కానీ అది చివరి నిమిషంలో ఆగిపోవడంతో ఇప్పుడు అదే కథని తెలుగు – తమిళ భాషల్లో నిర్మించాలనుకుంటున్నాడు అనే విషయాన్ని ఇది వరకే తెలుసుకున్నాం. ఇప్పుడు మణి రత్నం తన సినిమా కోసం నానిని ఒక హీరోగా ఫైనలైజ్ చేసినట్లు సమాచారం. మణిరత్నం సినిమాలో ఛాన్స్ కోసం ఎదురు చూస్తున్న నాని కూడా స్టొరీ లైన్ విని వెంటనే సినిమాకి గ్రీన్ సిగ్నల్ ఇచ్చినట్లు సమాచారం. పూర్తి రివెంజ్ డ్రామాగా రానున్న ఈ సినిమాలో నిత్యా మీనన్, కీర్తి సురేష్ లను హీరోయిన్స్ గా ఎంపిక చేసారు. కానీ వీరిద్దరిలో ఒకరు చేంజ్ అయ్యే అవకాశం ఉందని అంటున్నారు. ఎఆర్ రెహమాన్ మ్యూజిక్ అందించనున్న ఈ సినిమాకి రవి వర్మన్ సినిమాటోగ్రాఫర్. ఈ ఏడాది మణిరత్నం నుంచి వచ్చిన హిట్ మూవీ ఓకే బంగారం సినిమాలో దుల్కర్ సల్మాన్ వాయిస్ కు నాని తెలుగు డబ్బింగ్ చెప్పారు. ఇప్పుడు ఏకంగా హీరో ఛాన్సే దక్కించుకోబోతున్నాడు.