గ్లామర్ పాత్రల్లో మెప్పించింది, జేజమ్మగా జేజేలు అందుకుంది. రాణీ రుద్రమగా వీరత్వం చాటుకోబోతోంది. ఇక ఇప్పుడు భక్తురాలిగా మారి ఆధ్యాత్మిక చింతనలోకి వెళతానంటోంది అనుష్క. సత్యసాయిబాబా జీవిత చరిత్రపై తీస్తున్న సినిమాలో ఇప్పుడు అనుష్క సాయి భక్తురాలిగా నటిస్తోందట. మళయాళ నటుడు దిలీప్ ఈ చిత్రంలో సాయి బాబా క్యారెక్టర్ లో నటిస్తున్నాడు. ఈ చిత్ర ప్రొడక్షన్ కంట్రోలర్ ఈ విషయాలను వెల్లడి చేశారు. ఈ చిత్రంలో భక్తురాలా లేదా మరేదైనా క్యారెక్టర్ చేయనుందా అనేది ఇంకా పూర్తిగా తెలియలేదు. ఈ చిత్రం హైదరాబాద్ లో జూన్ లో మొదలు పెట్టనున్నట్టు కూడా తెలుస్తోంది. అనుష్క చేతిలో ఇంకా కొన్ని సినిమాలు షూటింగ్ పార్ట్ ముగించాల్సి ఉంది. ‘ఎన్నై అరిందాల్’ ముగిసిన తరువాత, తెలుగులో బాహుబలి, రుద్రమదేవి చిత్రాలు విడుదలకు సిద్ధమవుతున్నాయి. ఇది పూర్తిగా సత్యసాయిబాబా జీవిత కథతో తీస్తున్న సినిమా కావడంతో‘సత్యసాయిబాబా’ గా టైటిల్ ఫిక్స్ చేసినట్టు తెలుస్తోంది. చిత్రానికి కోడి రామక్రిష్ణ దర్శకత్వం వహిస్తుండగా, షూటింగ్ జూన్ లో మొదలు పెడతారట. బాబా 22వ సంవత్సరం నుంచి చనిపోయే వారకూ పూర్తి కథను ఇందులో తీసుకోనున్నారట. సినిమాలో బాబాకు తల్లిగా మరో నటి జయప్రద కూడా నటిస్తోంది. మళయాళ నటుడు శ్రీజిత్ కూడా మరో ప్రముఖ పాత్రలో నటించనున్నారట. ఈ చిత్రాన్ని హిందీ, ఇంగ్లీష్, తమిళ్ ఇతర ఇండియన్ లాంగ్వేజ్ లలోకి డబ్ చేయడానికి కూడా సిద్ధమవుతున్నారు.
.jpg)
