పాటల విడుదల సన్నాహాల్లో ‘జిల్లా’....

తమిళంలో ఘన విజయం సాధించిన ‘జిల్లా’ చిత్రాన్ని అదే పేరుతో తెలుగులో అనువాదం చేస్తుండడం తెలిసిందే. విజయ్‌`కాజల్‌ జంటగా నటించిన ఈ చిత్రంలో మలయాళ సూపర్‌స్టార్‌ మోహన్‌లాల్‌ ఓ ముఖ్య పాత్ర పోషించారు. సూపర్‌గుడ్‌ ఫిలింస్‌ అధినేత ఆర్‌.బి.చౌదరి సమర్పణలో తన మిత్రుడు ప్రసాద్‌ సన్నితితో కలిసి ‘శ్రీ ఓబులేశ్వర ప్రొడక్షన్స్‌’ పతాకంపై యువ నిర్మాత తమటం కుమార్‌రెడ్డి ఈ ప్రతిష్టాత్మక చిత్రాన్ని తెలుగు ప్రేక్షకులకు అందిస్తున్నారు. నామన శంకర్రావు సహ నిర్మాత. డి.ఇమాన్‌ సంగీత సారధ్యంలో వెన్నెలకంటి సాహిత్యంతో రూపొందిన ఈ చిత్రం గీతాలు ‘మధుర ఆడియో’ ద్వారా ఈవారంలో విడుదల కానున్నాయి. ఈ చిత్రం తెలుగు వెర్షన్‌ కోసం బ్రహ్మానందం, ఎల్‌.బి.శ్రీరాం, సురేఖావాణి తదితరులపై కొన్ని సన్నివేశాలను ప్రత్యేకంగా చిత్రీకరించడం విశేషం. అలాగే ఈ చిత్ర హీరోహీరోయిన్లు విజయ్‌`కాజల్‌తోపాటు ఇతర ముఖ్యపాత్రలు పోషించిన మోహన్‌లాల్‌, సంపత్‌, ప్రదీప్‌ రావత్‌, పూర్ణిమ భాగ్యరాజ్‌, మహత్‌ రాఘవేంద్ర, సూరి తదితరులంతా తెలుగు ప్రేక్షకులకు సుపరిచితులు కావడం గమనార్హం. అందుకే.. ఈ సినిమాను చూసే ప్రేక్షకులంతా అచ్చమైన తెలుగు సినిమా చూస్తున్న అనుభూతికి లోనవుతారని, అందుకు అవసరమైన అన్ని జాగ్రత్తలు తీసుకొన్నామని నిర్మాతలు తమటం కుమార్‌రెడ్డి`ప్రసాద్‌ సన్నితి అంటున్నారు. ముఖ్యంగా.. ఈ చిత్రాన్ని ఆర్‌.బి.చౌదరి వంటి లెజండరీ ప్రొడ్యూసర్‌తో కలిసి నిర్మిస్తుండడం చాలా గర్వంగా ఉందని వారు పేర్కొన్నారు. ఈవారంలో పాటలు విడుదల చేసి, నెలాఖరుకు సినిమాను రిలీజ్‌ చేసేందుకు సన్నాహాలు చేస్తున్నామని సహనిర్మాత నామన శంకర్రావు తెలిపారు. ఈ చిత్రానికి సినిమాటోగ్రఫి: గణేష్‌ రాజవేలు, ఎడిటింగ్‌: డాన్‌మ్యాక్స్‌, పబ్లిసిటి డిజైనర్‌: ‘డ్రీమ్‌లైన్‌’ కృష్ణప్రసాద్‌, మ్యూజిక్‌: డి.ఇమాన్‌, పాటలు: వెన్నెలకంటి, మాటలు: శశాంక్‌ వెన్నెలకంటి, సహనిర్మాత: నామన శంకర్రావు, నిర్మాతలు: తమటం కుమార్‌రెడ్డి`ప్రసాద్‌ సన్నితి, సమర్పణ: ఆర్‌.బి.చౌదరి, నిర్మాణ సంస్థలు: సూపర్‌గుడ్‌ ఫిలింస్‌`శ్రీ ఓబులేశ్వర ప్రొడక్షన్స్‌, కథ`స్క్రీన్‌ప్లే`దర్శకత్వం: ఆర్‌.టి.నేసన్‌