చాలా రోజుల తరువాత ఉపేంద్ర సన్నాఫ్ సత్య మూర్తిలో ఓ ప్రత్యేక పాత్రలో కనిపించారు. తెలుగులో కన్యాదానం డైరెక్ట్ సినిమాలో కూడా నటించారు. అయితే ఆయన సినిమాలు 15 ఏళ్ళ క్రితం కన్నడం నుంచి డబ్ చేసిన సినిమాలు చాలానే ఉన్నాయి. తెలుగువారికీ ఈ హీరో బాగా సుపరిచితుడు. గమ్మత్తైన టైటిల్స్, వైవిధ్యమైన కథలతో పాపులర్ అయ్యాడు ఈ హీరో. ‘ఎ’, ‘రా’, ‘ఉపేంద్ర’ చిత్రాలతో తెలుగు ప్రేక్షకుల మనసుల్లో తనకంటూ ఓ స్థానాన్ని సంపాదించుకున్నాడు. ఇన్నాళ్ళ తరువాత మళ్ళీ ఇప్పుడు ‘ఉపేంద్ర 2′ ద్వారా హీరోగా తెలుగు ప్రేక్షకుల ముందుకు రాబోతున్నాడు. విశేషం ఏంటంటే 14 ఏళ్ల క్రితం ఉపేంద్రతో ‘రా’ చిత్రం నిర్మించి, నిర్మాతగా రంగప్రవేశం చేసిన నల్లమలుపు శ్రీనివాస్ (బుజ్జి) ఈ చిత్రాన్ని నిర్మించారు. కన్నడ, తెలుగు భాషల్లో రూపొందిన ఈ చిత్రం ‘ఉపేంద్ర’ చిత్రానికి సీక్వెల్. కన్నడ వెర్షన్ కి ‘ఉప్పి 2′ టైటిల్ ఖరారు చేయగా, తెలుగు వెర్షన్ కి ‘ఉపేంద్ర 2′ టైటిల్ ని ఖరారు చేసారు. ఈ చిత్రానికి దర్శకత్వం వహించడంతో పాటు రచయిత కూడా ఉపేంద్రే. ‘గాలిపటం’ చిత్రం ద్వారా తెలుగు ప్రేక్షకులకు పరిచయం అయిన క్రిస్టీనా అకీవా ఈ చిత్రంలో ఓ హీరోయిన్ కాగా, పరుల్ యాదవ్ మరో హీరోయిన్. ఇంకా ఈ చిత్రం గురించి నిర్మాత నల్లమలుపు బుజ్జి మాట్లాడుతూ ... ‘‘‘ఉపేంద్ర’ చిత్రం అప్పట్లో ఓ సంచలనం. ఈ సీక్వెల్ కూడా ఆద్యంతం ఉత్కంఠకు గురి చేసే విధంగా ఉంటుంది. ఈ వారంలోనే ఆడియోను విడుదల చేసి, ఈ నెలలోనే సినిమాని విడుదల చేయడానికి సన్నాహాలు చేస్తున్నాం” అని తెలిపారు. మరి పదిహేనేళ్ళ క్రితం హీరోగా ఆదరించిన ప్రేక్షకులు మళ్ళీ ఇన్నాళ్ళకు వస్తున్న ఉపేంద్రను ఎలా రిసీవ్ చేసుకుంటారో ఉపేంద్ర 2 తో తేలిపోతుంది.
.jpg)
