కేరింత పాట కేక....

యంగ్ స్టర్స్ నటించిన కేరింత సినిమాకు మిక్కిజె మేయర్ సంగీతం అందిస్తున్నారు. ఈ సినిమాలో ఒక పాటను రేడియో మిర్చి ద్వారా సోమవారం హైదరాబాద్ లో విడుదల చేసారు. ఈ సందర్భంగా ఏర్పాటు చేసిన విలేకర్ల సమావేశంలో నిర్మాత దిల్ రాజు మాట్లాడుతూ "ముగ్గురు హీరోలు, ముగ్గురు హీరోయిన్లతో ఈ చిత్రాన్ని తెరకెక్కిస్తున్నాం. ఈ చిత్రానికి సంగీతం అందివ్వడానికి మిక్కి జె మేయర్ రెండు సంవత్సరాలుగా పని చేస్తున్నాడు. మా బ్యానర్ లో మిక్కి సంగీతం అందించిన సినిమాలు కొత్త బంగారులోకం, సీతమ్మవాకిట్లో సిరిమల్లెచెట్టు మ్యూజికల్ గా హిట్ అయిన సంగతి తెలిసిందే. ఈ చిత్రం కూడా అదే కోవలోకి వస్తుందని భావిస్తున్నాను. ఈ సినిమాలో మొత్తం ఆరు పాటలు ఉన్నాయి. అందులో ఖచ్చితంగా రెండు, మూడు పాటలు ఈ సంవత్సరం అంతా వినిపిస్తూనే ఉంటాయి. ఈ చిత్రం ఆడియో ఏప్రిల్ 25న ఆదిత్య మ్యూజిక్ ద్వారా మార్కెట్లోకి రిలీజ్ చేయనున్నాం. మే నెలలో సినిమా విడుదల చేయడానికి సన్నాహాలు చేస్తున్నాం" అని తెలిపారు. సంగీత దర్శకుడు మిక్కి జె మేయర్ మాట్లాడుతూ "రామజోగయ్యశాస్త్రి గారు మంచి సాహిత్యాన్ని అందించారు. సినిమాలో పాటలు అధ్బుతంగా వచ్చాయి" అని చెప్పారు. ఈ సినిమా మొదలై రెండు సంవత్సరాలు కావస్తోంది. చిత్రం చాలా క్వాలిటీగా వచ్చిందనీ, యూత్ మెచ్చేలా ఉంటుందనీ, పాటల కోసం సంగీత దర్శకుడు చాలా కష్టపడ్డాడని చిత్రం యూనిట్ మొత్తం చెపుతోంది. పోస్టర్లు మాత్రం యూత్ మెచ్చేలా ఉన్నాయి. ఇప్పటి వరకూ వచ్చిన యూత్ సినిమాలను ఈ చిత్రం బీట్ చేస్తుందో లేదో చూడాలి.