నటసింహ నందమూరి బాలకృష్ణ హీరోగా రుద్రపాటి ప్రేమలత నిర్మాణ సారధ్యంలో జివ్వాజి రామాంజనేయులు సమర్పణలో ఎస్‌.ఎల్‌.వి సినిమా పతాకంపై ప్రముఖ నిర్మాత రుద్రపాటి రమణారావు నిర్మిస్త్తోన్న చిత్రం ‘లయన్’. లెజెండ్‌ వంటి బ్లాక్‌ బస్టర్‌ హిట్‌ తర్వాత బాలకృష్ణ నటిస్తున్న ఈ చిత్రంతో సత్యదేవ దర్శకుడుగా పరిచయం అవుతున్నారు. త్రిష, రాధికాఅప్టే హీరోయిన్స్‌. గతంలో బాలకృష్ణ పన్నెండు మ్యూజికల్‌ హిట్స్‌ను అందించిన మెలోడి బ్రహ్మా మణిశర్మ సంగీతం అందించిన ఈ సినిమా ఆడియో విడుదల కార్యక్రమం ఏప్రిల్‌9న హైదరాబాద్‌లోని శిల్పకళావేదికలో సినీ, రాజకీయ ప్రముఖుల సమక్షంలో అంగరంగ వైభవంగా జరిగింది. ఆంధ్రప్రదేశ్‌ రాష్ట్ర ముఖ్యమంత్రి నారా చంద్రబాబు నాయుడు ఈ కార్యక్రమానికి ముఖ్య అతిథిగా హాజరయ్యారు.
బిగ్‌ సీడీని, ఆడియో సీడీలను నారా చంద్రబాబు నాయుడు ఆవిష్కరించారు. తొలి సీడీని నందమూరి బాలకృష్ణకి అందజేశారు.
థియేట్రికల్‌ ట్రైలర్‌ ను నందమూరి రామకృష్ణ, పరిటాల శ్రీరామ్‌, బోయపాటి శ్రీను ఆవిష్కరించారు.
ఈ కార్యక్రమంలో చిత్రనిర్మాత రుద్రపాటి రమణారావు తెలుగుదేశం పార్టీ కార్యకర్తలకు ఐదు లక్షలు, బసవతారకం క్యాన్సర్‌ ఇన్స్‌ ట్యూట్‌ కోసం ఐదు లక్షల రూపాయలు విరాళం ఇచ్చారు. అవయవ దానం చేసిన మణికంఠ అనే యువకుడి కుటుంబానికి యువ మీడియా వారు రెండు లక్షలు అందచేశారు. ఆడియో లహరి మ్యూజిక్‌ ద్వారా మార్కెట్లోకి విడుదలైంది. ఈ సందర్భంగా...
నటసింహ నందమూరి బాలకృష్ణ మాట్లాడుతూ ‘‘కొత్త దనాన్ని ఇండస్ట్రీకి పరిచయం చేయడమే కాకుండా నిర్మాతలు బాగుండాలని నాన్నగారు కోరుకునేవారు. అటువంటి మహనీయుడైన ఎన్టీఆర్‌ మనందరికి స్ఫూర్తిగా నిలిచిన వ్యక్తి. అలాగే నేను కూడా భైరవద్వీపంలో కురూపిగా చేసినా, ఆదిత్య 369 వంటి సైంటిఫిక్‌ మూవీ చేసినా, శ్రీరామరాజ్యం వంటి పౌరాణిక సినిమా చేసినా అభిమానులపై ఉన్న నమ్మకమే. కొత్తదనం కోమే నేను ప్రయత్నిస్తుంటాం. అభిమానులు కూడా అండగా నిలబడ్డారు. తెలుగు రాష్ట్రం రెండు రాష్ట్రాలుగా విడిపోయినా మనం అందరం ఒకటే. నాన్నగారి ఆశయాలు, దేవుడు ఆశీర్వాదం, అభిమానుల బలం ఉన్నంత వరకు బాలకృష్ణ ఎప్పుడూ లయన్ గానే ఉంటాడు. రుద్రపాటిగారు నా అభిమానిగా ఉండి నిర్మాత అయ్యారు. అలాగే రేపు నిర్మాతగా ఎవరికైనా అవకాశం రావచ్చు. ఈ సినిమాతో సత్యదేవగారు దర్శకుడిగా పరిచయం అవుతున్నారు. సత్యదేవ్‌ సినిమాని మంచి టెక్నికల్‌ వాల్యూస్‌తో అద్భుతంగా తగిన విధంగా మలిచారు. సినిమాలో చాలా షేడ్స్‌ ఉన్నాయి. మణశర్మగారితో గతంలో ఎన్నో హిట్‌ చిత్రాలకు పనిచేశారు. ఈ చిత్రంలో కూడా ఐదు అద్భుతమైన సాంగ్స్‌ ఇచ్చారు. లెజెండ్‌ మే 2న 400రోజులు వేడుకను జరుపుకోబోతున్నాం. ఎమ్మిగనూరులో జరిగే ఈ కార్యక్రమానికి చంద్రబాబునాయుడుగారు ముఖ్యఅతిథిగా హాజరుకానున్నారు. నేను సాధించి ఈ విజయాలన్నీ తెలుగు అభిమానులదే. త్వరలోనే సినిమా విడుదల కానుంది. నందమూరి అభిమానులు కోరుకున్న విధంగానే సినిమా ఉంటుంది’’ అన్నారు.
ఆంధ్రప్రదేశ్‌ ముఖ్యమంత్రి నారా చంద్రబాబు నాయుడు మాట్లాడుతూ ‘‘గతంలో నేను ముఖ్యమంత్రిగా ఉన్నప్పుడు సమరసింహారెడ్డి, నరసింహనాయుడు చిత్రాల ఆడియో విడుదలను నేనే చేశాను. ఆ సినిమాలు చరిత్రలు సృష్ఠించాయి. ఇప్పుడు మరోసారి ముఖ్యమంత్రిగా ఇక్కడికి వచ్చాను. ఈ సినిమా కూడా సూపర్‌డూపర్‌ హిట్టవుతుంది. తెలుగు చలనచిత్ర రంగంలో లయన్ చరిత్ర సృష్టించడం ఖాయం. బాలయ్యకు ఎవరూ పోటీ లేదు. బాలయ్యకు బాలయ్యే పోటీ. అప్పట్లో ఎన్టీఆర్‌ గారు ఏ క్యారెక్టర్‌ చేసినా ఆయనకు ఎవరూ పోటీ లేరు. నేను సవాలు విసురుతున్నా..ఇలాంటి క్యారెక్టర్‌ చేసే వారు ఎవరూ లేరు. అది ఒక బాలయ్యకే సాధ్యం. బాలయ్య సినిమాలను వేరే చిత్రాలతో పోలిక పెట్టలేం. సత్యదేవ ఈ చిత్రంతో దర్శకుడుగా పరిచయం అవుతున్నాడు. తొలి చిత్రంతో సత్యదేవ్‌ గారు చరిత్ర సృష్టిస్తారు. సత్యదేవ్‌ తాతగారు సంగీత్‌ వెంకట్‌ రెడ్డిగారు నాతో మినిష్టర్‌ గారు పనిచేశారు. రుద్రపాటి రమణారావుగారు మా పార్టీ అభిమాని కూడా మణిశర్మగారి సంగీతం గురించి ప్రత్యేకంగా చెప్పనక్కర్లేదు. మాస్‌ హీరో అంటే బాలయ్యే. వేరే వారెవరూ లేదు. ఏ పనిచేస్తున్న డేడికేషన్‌ తో, ఫోకస్‌ తో చేస్తారు. ట్రైలర్‌ చూస్తుంటే చాలా బాగుంది. ఈ సినిమాలో బాలకృష్ణ యంగ్‌ గా కనిపిస్తున్నాడు. ఆయన ఏ పనిచేసినా దీక్షతో, పట్టుదలతో చేస్తున్నారు. సినిమా చూడటానికి అందరం ఎంతో ఆసక్తిగా ఎదురుచూస్తున్నాం. ఇంతటి మంచి చిత్రాన్ని నిర్మించిన దర్శక, నిర్మాతలను అభినందిస్తున్నాను. మణిశర్మగారు అద్భుతమైన సంగీతాన్ని సమకూర్చారు. రెండు రాష్ట్రాల్లో సినిమా పరిశ్రమ అభివృద్ధి జరగాలి. ఈ సందర్భంగా నిర్మాతలకు నేను చెప్పే విషయం ఒకటే. ఏ సినిమా చేయాలన్నా విదేశాలకు వెళ్లనక్కర్లేదు. విశాఖపట్నం, కాకినాడ. కోనసీమ సహా చాలా మంచి లోకేషన్స్‌ ఉన్నాయి. తెలుగు సినిమాయే కాదు ఏ సినిమా చేయాలన్నామన ఆంధ్రప్రదేశ్‌ కి వచ్చే విధంగా మనం ప్రయత్నించాలి. లయన్ వంటి సినిమాలకు తెలుగుజాతిని ఏకం చేసే సినిమా. తెలుగు సినిమాకి మంచి భవిష్యత్‌ ఉంది. హిందీ చిత్రసీమ తర్వాత ఆంధ్రప్రదేశ్‌, తెలంగాణా రాష్ట్రాల్లోనే కాకుండా ఓవర్‌ సీస్‌ లో కూడా తెలుగు సినిమాకి బ్రహ్మాండమైన భవిష్యత్‌ ఉంది. రాబోయే రోజుల్లో లయన్ బాలకృష్ణ గత చిత్రాల రికార్డుని బద్ధలు కొడుతుంది. కనీసం ఒక ఏడాది అడుతుందని భావిస్తున్నాను. వందరోజుల ఫంక్షన్‌ కి కాదు ఏడాది పూర్తి చేసుకున్న తర్వాత జరిగే ఫంక్షన్‌ కి హాజరవుతాను. అందరికీ ఆల్‌ ది బెస్ట్‌’’ అన్నారు.
చిత్ర దర్శకుడు సత్యదేవ్‌ మాట్లాడుతూ ‘‘గతంలో బాలయ్య నటించిన పన్నెండు సినిమాలకు మణిశర్మగారు బాలయ్యతో మణిశర్మగారు సంగీతం ఇచ్చారు. అన్నీ మ్యూజికల్‌ హిట్‌గా నిలిచాయి లయన్ పదమూడవ సినిమా. ఆడియో సింహా, లెజెండ్‌ లకు ఏమాత్రం తగ్గదు. నిర్మాతగారు సినిమాని ఎక్కడా కాంప్రమైజ్‌ కాకుండా నిర్మించారు. స్క్రీన్‌ మీదనే కాదు, రియల్‌ గా కూడా బాలకృష్ణగారు హీరోనే. లయన్ అనే టైటిల్‌ పేటెంట్‌ హక్కు కలిగిన హీరో. ఇచ్చిన మాట తప్పని వ్యక్తి. గ్రేట్‌ లయన్. టెక్నికల్‌ మిక్స్‌ అయన స్క్రిప్ట్‌ ను నమ్మి సినిమా చేశారు. సింహా రిలీజ్‌ కాకముందే ఈ కథను ఆయనకు చెప్పాను. అప్పటి నుండి ఆయనతోనే ట్రావెల్‌ చేస్తున్నాను. లెజెండ్‌ తర్వాత సినిమా డైరెక్టర్గ గా నాకు అవకాశం ఇచ్చారు. ఈ క్రెడిట్‌ అంతా ఆయనకే సొంతం. ఎన్నో సమయాల్లో నాకు ఆయన నాకు ధైర్యం చెప్పారు. కర్త, కర్మ, క్రియ ఆయనే. ఈ సినిమాలో నాకు సపోర్ట్‌ చేసిన ప్రతి ఒక్కరికి థాంక్స్‌. ఆయన సినిమాలన్నింటికి ధీటుగా ఉంటుంది అన్నారు.
చిత్ర నిర్మాత రుద్రపాటి రమణారావు మాట్లాడుతూ ‘‘అభిమానులను నిర్మాతగా మార్చే ధైర్యం ఒక నందమూరి వంశానికే సాధ్యం. లెజెండ్‌ టైమ్‌ లో ఈ సినిమా చేస్తామని నాతో అన్నారు. అన్నట్లుగానే సినిమా చేశారు. లెజెండ్‌ వంటి హిట్‌ తర్వాత ఎంత మంది నిర్మాతలు ఆయన్ని సంప్రదించినా ఆయన నాకిచ్చిన మాట నిలబెట్టుకున్నారు. నిర్మాతల బాగుకోరే వ్యక్తి. లయన్ సినిమా ఈ ఏప్రిల్‌ నెలలో విడుదలవుతుంది. ఈ సినిమాతో నందమూరి అభిమానులు పండుగ చేసుకుంటారు’’ అన్నారు.
బోయపాటి శ్రీను మాట్లాడుతూ ‘‘లయన్ బాలకృష్ణగారి 98వ సినిమా. ఈ లెక్కలన్నీ అభిమానులకే బాలయ్యబాబుగారు మాత్రం ప్రతి సినిమాని తొలి సినిమాగానే భావించి చేస్తారు. తప్పకుండా లయన్ చిత్రం బాలయ్యగారికి మరో హిట్‌ అవుతుంది. దర్శకుడు తొలిసినిమానే బాలయ్యగారితో అద్భుతమైన సినిమా చేశారని భావిస్తున్నాను. మణిశర్మగారు చాలా గ్యాప్‌ తర్వాత బాలయ్యగారి సినిమాకి కసితో మ్యూజిక్‌ ఇచ్చారు. వీరి కాంబినేషన్‌ లో వచ్చిన సినిమాలన్నీ పెద్ద హిట్‌ మూవీస్‌. అలాగే ఈ ఆడియో, సినిమా పెద్ద హిట్టవుతుంది. రుద్రపాటి రమణారావుగారు ఎక్కడా కాంప్రమైజ్‌ కాకుండా సినిమాని తెరకెక్కించారు. నందమూరి అభిమానులు మెచ్చే సినిమా అవుతుంది’’ అన్నారు.
ఈ కార్యక్రమంలో ఆంధ్రప్రదేశ్‌ డిప్యూటీ సీఎం, హోమ్‌ మినిష్టర్‌ నిమ్మకాయల చినరాజప్ప, ఏపీ టిడిపి పొలిట్‌ బ్యూరో సభ్యుడు సోమిరెడ్డి చంద్రమోహన్‌ రెడ్డి, రెవెన్యూ మినిష్టర్‌ కె.ఇ.కృష్ణమూర్తి, ఐటీ మినిష్టర్‌ పల్లె రఘునాథరెడ్డి, ఎర్రబెల్లి దయాకర్‌ రావు, పరిటాల సునీత, రేవంత్‌ రెడ్డి, కె.ఎల్‌.నారాయణ, త్రిష, భవ్య ఆనంద్‌ ప్రసాద్‌, కొర్రపాటి సాయి, మాగంటి గోపి, రేవంత్‌ రెడ్డి, బోయపాటి శ్రీను, ఆంధ్రప్రదేవ్‌ విప్‌ యామిని బాల, అంబికా కృష్ణ, నందమూరి రామకృష్ణ, పరిటాల శ్రీరామ్‌, లహరి మనోహర్‌ నాయుడు, శ్రీవాసు, అనిల్‌ రావిపూడి, ఎల్‌.రమణ, సమీర్‌, శ్రవణ్‌, గౌతంరాజు, సినిమాటోగ్రాఫర్‌ ప్రసాద్‌, చిత్రలేఖ, డైమండ్‌ రత్నం, రామ్‌ అచంట, గోపి అచంట, తదితరులు పాల్గొని చిత్రయూనిట్‌ను అభినందించారు. రామకృష్ణ, పరిటాల శ్రీరామ్‌, లహరి మనోహర్‌ నాయుడు, శ్రీవాసు, అనిల్‌ రావిపూడి, ఎల్‌.రమణ, సమీర్‌, శ్రవణ్‌, గౌతంరాజు, సినిమాటోగ్రాఫర్‌ ప్రసాద్‌, చిత్రలేఖ, డైమండ్‌ రత్నం, సాయికొర్రపాటి, రావమ్‌ అచంట, గోపి అచంట, తదితరులు పాల్గొని చిత్రయూనిట్‌ను అభినందించారు.
.jpg)
