గబ్బర్ సింగ్ 2 వార్తలు కొన్నాళ్ళు హల్ చల్ చేసి, ఇక లేనట్టే అంటూ నిరాశకు గురి చేశారు. ఆశా... నిరాశల మధ్య పవన్ ఫాన్స్ కొట్టుమిట్టాడారు కొన్నాళ్ళు. ఇప్పుడు మళ్ళీ స్క్రిప్టు రెడీ అవుతుందంటూ ఓ వార్త బయటికి వచ్చింది. ఈ ‘గబ్బర్‌సింగ్ 2’ స్క్రిప్టు విషయంలో పవన్ కల్యాణ్ పూర్తిగా లీనమైపోయారట. దర్శకుడికి సలహాలు, సూచనలిస్తూ స్క్రిప్టు పకడ్బందీగా రావడానికి సాయపడుతున్నారట. ‘‘స్క్రిప్టు పని జరుగుతోంది. భారీ సినిమా కాబట్టి, కావలసిన అంశాలను పక్కాగా ఖరారు చేసుకుంటున్నాం. దర్శకుడు బాబీ స్క్రిప్టుకు తుది మెరుగులు దిద్దుతున్నారు. అంతా సిద్ధం కాగానే షూటింగ్ ప్రారంభ తేదీ అధికారికంగా ప్రకటిస్తాం’’ అని శరత్‌మరార్ వివరించారు. నిజానికి, మీడియాలోని వార్తల నేపథ్యంలో ముందుగా షూటింగ్ మొదలుపెట్టి, కొద్ది రోజులు జరిపి, ఊహాగానాలకు తెర దించాలనే ప్రతిపాదన కూడా వచ్చింది. కానీ, పవన్ మాత్రం అలా వద్దనీ, పూర్తి స్క్రిప్టుతో, లొకేషన్లను కూడా పక్కాగా నిర్ణయించుకొని ఏకధాటిగా షూటింగ్ జరుపుదామనీ దర్శక, నిర్మాతలకు నచ్చజెప్పినట్లు తెలుస్తోంది.
.jpg)
