మాటల మాంత్రికుడి కోసం క్యూ కడుతున్నారు

దర్శకుడు త్రివిక్రమ్ కోసం ఇప్పుడు హీరోలంతా క్యూ కడుతున్నారు. మూస ధోరణిలో మాస్ సినిమాలు చేస్తూ పోతున్న యువహీరోలంతా సరైన హిట్ కోసం ఇప్పుడీ మాటల మాంత్రికుడి దర్శకత్వంలో నటించాలని ఉవ్విళ్లూరుతున్నారట. త్రివిక్రమ్ కి ఓవైపు క్లాస్ తోపాటు మాస్ లోనూ మంచి పేరు ఉండటం, స్క్రిప్ట్ లో కథ, కథనం, డైలాగులు బలంగా ఉపయోగించటంతో తమ సినిమాలో కాస్త చేంజ్ ఉండి జనాలు ఆదరిస్తారన్న నమ్మకంలో వారున్నట్లు సమాచారం. ముఖ్యంగా మెగా పవర్ స్టార్ రాంచరణ్ సరైన హిట్ కోసం చాలాకాలంగా ఎదురుచూస్తున్నాడు. అలాంటి హిట్ త్రివిక్రమ్ ద్వారా లభిస్తుందనే నమ్మకంతో ఆయన వున్నాడు. ఇదే నేపథ్యంలో అఖిల్ నెక్స్ట్ సినిమా త్రివిక్రమ్ తో వుంటే బాగుంటుందని నాగార్జున ఆలోచన చేస్తున్నట్టుగా తెలుస్తోంది. రచయితగా దర్శకుడిగా త్రివిక్రమ్ కి మంచి పేరుంది. దర్శకుడిగా ఆయన తెరకెక్కించిన సినిమాల్లో ఎక్కువ శాతం సూపర్ హిట్ల జాబితాలో చేరిపోయినవే.

                   లవ్, యాక్షన్, ఫ్యామిలీ సెంటిమెంట్ కామెడీ ఆయన సినిమాల్లో సమపాళ్లలో కనిపిస్తూ వుంటాయి కనుక, అన్ని వర్గాల ప్రేక్షకులు ఆ సినిమాలను ఆదరిస్తుంటారు. అందువలన ఆయన సినిమాల్లో నటించాలనే చరణ్ ముచ్చట తీర్చడానికి పవన్ కల్యాణ్ కూడా ముందుకొచ్చాడు. తాను నిర్మాతగా వ్యవహరిస్తాననీ .. చరణ్ కి ఒక సినిమా చేసిపెట్టమని ఆయన త్రివిక్రమ్ తో చెప్పాడట. ఈ లోగా నాగార్జున కూడా అఖిల్ సినిమా విషయంగా త్రివిక్రమ్ తో సంప్రదింపులు జరుపుతున్నాడని అంటున్నారు. ప్రస్తుతం నితిన్ తో బిజీగా ఉన్న మరి ఈ ఇద్దరిలో ముందుగా త్రివిక్రమ్ ఎవరికి గ్రీన్ సిగ్నల్ ఇస్తాడోననేది ఆసక్తికరంగా మారింది.