ఖాన్ త్రయం ఒకే సినిమాలో కనిపిస్తారట...

బాలీవుడ్ ను ఏలుతున్న ముగ్గురు సూపర్ స్టార్లు, అమీర్ ఖాన్, సల్మాన్ ఖాన్, షారూఖ్ ఖాన్ దాదాపు ముగ్గురి సినీ జీవితం ఒకేసారి మొదలైందని చెప్పవచ్చు, అమీర్, సల్మాన్ ఒకేసారి, షారూఖ్ ఆ తరువాత ఎంటరయ్యాడు. దాదాపు ముప్ఫై ఏళ్ళుగా సినీ ఫీల్డ్ లో సూపర్ స్టార్లుగా సక్సెస్ బాటలో పయనిస్తున్నారు. అయితే ఈ ముగ్గురి మధ్య వృత్తిపరమైన పోటీ, జలసీలు సహజంగా కనిపించేవి. కానీ ఇటీవల కాలంలో సల్మాన్ కేసు కారణంగా పలకరింపులు, ఓదార్పుల ద్వారా మాటలూ, మనసులూ కలిసి పోయాయి. దీంతో ఇప్పుడు ఈ ముగ్గురినీ కలిపి సినిమా తీయాలనే ఆలోచన కలిగింది ఓ స్టార్ దర్శక, నిర్మాతకు. సాజిద్ నడియాడ్‌వాలా ఆ చిత్రాన్ని తెరకెక్కించనున్నారని సమాచారం. వచ్చే జనవరిలో ప్రారంభించి, డిసెంబరులో విడుదల చేయాలనుకుంటున్నాడట. ఇప్పటికే షారుక్, సల్మాన్‌లు కలిసి ‘కరణ్-అర్జున్’లో, సల్మాన్, ఆమిర్ ఖాన్‌లు కలిసి ‘అందాజ్ ఆప్నే ఆప్నే’లో కనిపించారు. అన్నీ కుదిరి, ముగ్గురూ కలిసి నటిస్తే ఇండియన్ సినిమా చరిత్రలో ఇదో బిగ్గెస్ట్ న్యూస్. సల్మాన్ ఖాన్, షారుక్ ఖాన్, అమీర్ ఖాన్ అభిమానులు కలలో కూడా ఊహించని న్యూస్ ఇది. 
ప్రస్తుతం ఈ ముగ్గురు ఇమేజ్ కి తగిన కథను సిద్ధం చేసే పనిలో ఉన్నారట. గతంలో బాలీవుడ్ లో వచ్చిన మన్మోహన్ దేశాయ్ సినిమా ‘అమర్ అక్బర్ ఆంథోనీ' తరహాలో ఈ చిత్రం ఉంటుందని ఊహాగానాలు చేస్తున్నారు.