కండలవీరుడి కేసుకథ తెరపైకి

సల్మాన్ ఖాన్ నల్ల జింకను వేటాడిన కేసు ఇప్పటికీ కోర్టు చుట్టూ తిరుగుతూనే ఉంది. అయితే ఇప్పుడీ కథను సినిమాగా తీయబోతున్నారట. రాజస్థాన్ లో నల్ల జింకను వేటాడిన పాపానికి సల్మాన్ 19 ఏళ్ళుగా ఇంకా కోర్టు గడప తొక్కుతూనే ఉన్నాడు. ఈ కేసునే సినిమాగా తీసేందుకు నిర్మాత రంజిత్‌‌శర్మ రెడీ అయ్యారు. ఈ కేసుకు సంబంధించి నాడు సల్మాన్ ఖాన్ జైల్లో 72 గంటలు ఉండగా అతనితోబాటు జైల్లో ఉన్న మహేష్‌‌సైనీ కూడా ఈ మూవీలో నటించబోతున్నాడు. ముంబైలోని ఫిల్మిస్తాన్ స్టూడియోలో సోమవారం ఈ చిత్రం షూటింగ్ ప్రారంభమైంది. త్వరలో జోధ్‌పూర్ సెంట్రల్ జైల్లో కూడా తాము షూటింగ్ జరుపుతామని రంజిత్ తెలిపారు. 2006 ఫిబ్రవరిలో రాజస్థాన్‌‌ లోని రెండు ప్రాంతాల్లో నల్ల జింక లను సల్మాన్ ఖాన్ మరికొందరు కలిసి వేటాడారు. ఆ కేసులో సల్మాన్‌‌కు జైలుశిక్ష పడడం, దానిని సవాలు చేస్తూ ఈ నటుడు కోర్టుకెక్కడం, అతనికి బెయిల్ లభించడం తెలిసిందే. ఈ కేసులో ఈనెల 25న కోర్టు తీర్పు ప్రకటించవచ్చునని, అదే రోజున తాము కోర్టు సీన్ చిత్రీకరిస్తామని రంజిత్ తెలిపారు. ఈ సినిమాలో సల్మాన్ డ్రైవర్ హరీష్ దులానీ కూడా నటించవచ్చునని, నాడు సల్మాన్ వేటాడేందుకు వాడిన జిప్సీ వాహనాన్నే తాము ఇందులో వినియోగిస్తామని ఆయన చెప్పారు. సల్మాన్ ని నిందితుడిగా కోర్టు చిత్రీకరించినా ఆయన ఇమేజ్ కు ఏ మాత్రం భంగం కలగకుండా ఈ చిత్రాన్ని తీస్తామని నిర్మాత రంజిత్ శర్మ తెలిపారు. ఇంతకు ఈ చిత్రానికి ‘ఖైదీ నెంబర్ 210’ టైటిల్ ను ఫిక్స్ చేశారట.