ఫేసుబుక్ లో తెలంగాణ చంద్రకళ (ఐఏఎస్)

తెలంగాణకు చెందిన ఐఏఎస్ అధికారి బి.చంద్రకళ ఉత్తరప్రదేశ్‌లో ప్రస్థుతం విధులు నిర్వహిస్తున్నారు. అక్రమాలకు పాల్పడే అధికారులు, సిబ్బంది, కాంట్రాక్టర్లకు ఆమె దడ పుట్టిస్తున్నారు. అవినీతికి పాల్పడితే అక్కడికక్కడే నిలబెట్టి దులిపేస్తున్నారు. బులంద్‌షహర్ జిల్లా కలెక్టర్ అయిన చంద్రకళ రహదారి పనుల్లో అక్రమాలకు పాల్పడిన అధికారులు, కాంట్రాక్టర్లను స్కూల్ పిల్లల్లా వరుసలో నిలబెట్టి మరీ క్లాస్ పీకారు. ఈ వీడియో ఇప్పుడు సామాజిక వెబ్‌సైట్లలో హల్‌చల్ చేస్తోంది. ఫేస్‌బుక్‌లో ఇప్పటివరకూ 6 లక్షల మంది ఈ వీడియోను చూశారు! దాంతో ఆమె ఒక్కసారిగా జాతీయస్థాయి వార్తల్లో నిలిచారు. బుధవారం బులంద్‌షహర్ జిల్లాలో పలు రహదారుల పనుల తీరును ఆమె పర్యవేక్షించారు. నాసిరకం ఇటుకలు, టైల్స్ వాడినట్టు ఈ సందర్భంగా గుర్తించారు. దాంతో జూనియర్ ఇంజనీర్లు, మున్సిపల్ అధికారులు, ఇతర సిబ్బందితోపాటు కాంట్రాక్టర్లపైనా ప్రజల సమక్షంలోనే ఆగ్రహం వ్యక్తం చేశారు. అక్రమాలపై విచారణకు ఆదేశించారు. దోషులపై కఠిన చర్యలు తీసుకుంటామని హెచ్చరించారు. 17 కాంట్రాక్టులను రద్దు చేశారు. ‘‘మీరు చేసే పని ఇదేనా? మీరు జైలుకు వెళ్లడం ఖాయం. మీలో కొంచెమైనా నిజాయితీ ఉందా? ’’ అంటూ గద్దించారు. ఈమె మథుర కలెక్టర్‌గా చేశారు. సమస్యలను ఎప్పటికప్పుడు పరిష్కరించడం ద్వారా అక్కడి ప్రజల మనసులు గెలుచుకున్నారు. గిరిజన తెగకు చెందిన బుఖ్యా చంద్రకళ స్వస్థలం కరీంనగర్ జిల్లా రామగుండం. పాఠశాల విద్యను రామగుండంలోనే అభ్యసించిన ఆమె డిగ్రీ, పీజీలను హైదరాబాద్‌లో పూర్తి చేశారు. 2008లో సివిల్స్ పరీక్షల్లో 409వ ర్యాంకు సాధించారు. ఆమె భర్త ఎ.రాములు శ్రీరామ్‌సాగర్ ప్రాజెక్టులో డిప్యూటీ ఎగ్జిక్యూటివ్ ఇంజనీర్‌గా పనిచేస్తున్నారు. వీరికి తొమ్మిదేళ్ల కుమార్తె ఉంది.