గుణశేఖర్ చారిత్రాత్మక చిత్రం రుద్రమదేవి ఇక ఆగదనిపిస్తోంది. ఎన్నాళ్ళనుంచో ఈ సినిమా కోసం ఎదురు చూస్తున్న జనాల్లో పోస్టర్లతో మళ్ళీ ఓ ఊపు తీసుకువచ్చాడు దర్శకుడు. ఇప్పుడు సెప్టెంబర్ 4న రుద్రమదేవిని విడుదల చేయనున్నట్లు నిర్మాతలు వెల్లడించారు. ఇప్పటివరకూ అనేకసార్లు వాయిదాపడ్డా... ఈసారి మాత్రం నిర్ణయించిన తేదీకే రిలీజ్ ఖాయమంటున్నారు చిత్ర యూనిట్. హైద్రాబాద్ లో నిర్వహించిన విలేకరుల సమావేశంలో ఈ విషయాన్ని అధికారికంగా ప్రకటించింది చిత్రబృందం. అనుష్క లీడ్ రోల్ చేసిన ఈ సినిమా చిత్రీకరణ... రెండేళ్లకు పైగా పట్టింది. పూర్తైన తర్వాత కూడా విడుదల కోసం అనేక అవాంతరాలు ఏర్పడ్డాయి. బాహుబలి కంటే ముందే థియేటర్ల లోకి తెచ్చేందుకు గుణశేఖర్ నిర్మాతలు శతవిధాలా కృషి చేశారు. అయినా, విడుదల మాత్రం సాధ్యపడలేదు. ఈ చిత్రాన్నిగుణశేఖర్ 3డీలో చిత్రీకరించారు. గోన గన్నారెడ్డిగా అల్లు అర్జున్ చేసిన పాత్ర ఈ చిత్రానికి ప్రత్యేక ఆకర్షణగా నిలవనుంది. చాళుక్య వీరభద్రునిగా రానా నటించారు. కృష్ణంరాజు నిత్యామీనన్ కేథరిన్ థెరిసాలు ఇతర ముఖ్యపాత్రల్లో కనిపించనున్నారు. ఇళయరాజా సంగీత స్వరపరచిన ఈ చిత్రానికి.. తోట తరణి ఆర్ట్ డైరెక్షన్ చేశారు.
.jpg)
