సంతోషం అవార్డుల వేడుక ఈ నెల 21న

గత 13 ఏళ్ళుగా ప్రతి సంవత్సరం సినిమా పరిశ్రమలోని వారికి అవార్డులు ఇస్తూ ప్రోత్సహిస్తున్న ప్రతిక 'సంతోషం'. ఈ వారపత్రిక పుట్టినరోజు ఆగస్టు 2. తన పత్రిక (పుత్రిక పుట్టిన రోజు కూడా) ప్రతీ పుట్టినరోజును ఇండస్ట్రీ పండగగా జరుపుతూ ప్రశంసలందుకుంటున్నారు సంతోషం ఎడిటర్‌ అండ్‌ పబ్లిషర్‌ సురేష్‌కొండేటి. ఏ కార్యక్రమం తలపెట్టినా నిర్ధిష్టంగా, కన్నులపండువగా నిర్వహించే సురేష్‌ కొండేటి ఈ అవార్డుల వేడుకను దక్షిణాదిన ఎవరూ జరపని విధంగా 12 ఏళ్లుగా నిర్వహిస్తూ వస్తున్నారు. ఈ నెలలో 21వ తేదీన సంతోషం సౌత్‌ ఇండియా ఫిల్మ్‌ అవార్డ్స్‌ మరియు పదమూడవ వార్షికోవత్సవ వేడుకలు ఎప్పటిలాగే అంగరంగ వైభవంగా జరుపనున్నారు. అయితే వేడుకకు ముందు కార్యక్రమంగా స్నేహితుల రోజు 'న ప్రారంభ వేడుకకు (కర్టన్‌రైజర్‌) తెర తీశారు. ఫిలింనగర్‌ క్లబ్‌లో జరిగిన ఈ కార్యక్రమానికి అగ్ర నిర్మాతలైన కె.ఎస్‌.రామారావు, 'సింధూరపుపువ్వు' కృష్ణారెడ్డి, కె.ఎల్‌.దామోద రప్రసాద్‌, చలనచిత్ర ప్రముఖులు కాజ సూర్యనారాయణ, నెంబర్‌వన్‌ న్యూస్‌ఛానల్‌ అధినేత సాయి సుధాకర్‌, ముఖ్య అతిధిగా సుప్రసిద్ధ గ్లామర్‌తార రాశీఖన్నా, యువహీరోలు నాగశౌర్య, నాగ అన్వేష్‌, తదితరులతో పాటుగా గాయనీగాయకులు మరియు సంగీత దర్శకులు రఘురామ్‌, పర్నిక, సాకేత్‌, ధామిని, శ్యామల తదితరులు పాల్గొన్నారు. ఈ సంతోషం అవార్డుల వేడుక టైటిల్‌ సాంగ్‌ను యువ హీరో నాగశౌర్య ఆవిష్కరించగా, ప్రసిద్ధ నిర్మాత కె.ఎస్‌.రామారావు ఫంక్షన్‌ ఇన్విటేషన్‌ కార్డును ఆవిష్కరించి మొదటి కార్డును నాగశౌర్యకు అందజేశారు. సింగర్స్‌ దామిని, రఘురామ్‌లు ఆలపించిన 'బాహుబలి' చిత్రంలోని పచ్చబొట్టేసిన పాటను ఆహూతుల హర్షధ్వనుల మధ్య ఆలాపించారు. ఈ అవార్డుల వేడుక ట్రైలర్స్‌ను సాయిసుధాకర్‌, కె.ఎల్‌.దామోదరప్రసాద్‌, నాగఅన్వేష్‌ ఆవిష్కరించారు. కాగా, ఒక్క నిమిషం ట్రైలర్‌ను బి.కృష్ణారెడ్డి, జెమినీ సురేష్‌, యాంకర్స్‌ శ్యామల ఆవిష్కరించగా, మరో వన్‌మినిట్‌ ట్రైలర్‌ను 'సింధూరపుపువ్వు' కృష్ణారెడ్డి, సాయిసుధాకర్‌, నాగఅన్వేష్‌ ఆవిష్కరించారు.