తెలుగు ‘బెంగుళూరు డేస్’ హుళక్కేనా?

‘బెంగళూరు డేస్’ సినిమా గురించి ఎప్పటి నుంచో వార్తలు వినిపిస్తున్నాయి. దీన్ని తెలుగులోకి రీమేక్ చేయడంపై ఇప్పటికీ ఓ క్లారిటీ రాలేదు.. దాదాపు ఏడాదిగా టాలీవుడ్ లో ఈ పేరు వినిపిస్తూనే ఉంది. మలయాళంలో అద్భుత విజయం సాధించిన ఈ సినిమాను తెలుగులో తమిళంలో రీమేక్ చేయాలని దిల్ రాజు, పొట్లూరి వరప్రసాద్ సంయుక్తంగా రీమేక్ రైట్స్ తీసుకున్నారు. ఏడాది నుంచి కాస్టింగ్ విషయంలో తర్జన భర్జన నడుస్తోంది. ముందు బొమ్మరిల్లు భాస్కర్ దర్శకత్వంలో తెలుగు, తమిళ భాషల్లో ఒకేసారి ఒకే కాస్టింగ్ తో తీయాలని.. అనుకున్నారు. కానీ తర్వాత రెండు భాషలకూ వేర్వేరు నటులు వేర్వేరు దర్శకులని అన్నారు. తమిళ వెర్షన్ ఆర్య రానా దగ్గుబాటి బాబీ సింహా శ్రీదివ్య ముఖ్య పాత్రల్లో బొమ్మరిల్లు భాస్కర్ దర్శకత్వంలో మొదలైపోయింది కూడా. తెలుగు వెర్షన్ కు ‘ఓ మై ఫ్రెండ్’ ఫేమ్ వేణు శ్రీరామ్ దర్శకత్వం వహిస్తాడని చెప్పారు. నటీనటులుగా చాలామంది పేర్లు వినిపించాయి. చివరికి వరుణ్ తేజ్, శర్వానంద్, అవసరాల శ్రీనివాస్, శ్రీ దివ్య ఖాయమన్నారు. కానీ తమిళ వెర్షన్ ఆరు నెలల కిందటే మొదలై షూటింగ్ పూర్తయ్యే దశలో ఉంది.  ఇప్పుడు నిర్మాతలు తమిళ వెర్షన్ నే తెలుగులో డబ్ చేసి విడుదల చేద్దామన్న అభిప్రాయానికి వచ్చారని తెలుస్తోంది.  ఇందులో నటించిన నటులు కూడా తెలుగువారికి తెలిసిన వాళ్ళే కావడంతో ఇదే బెటరన్న ఆలోచనలో నిర్మాతలు ఉన్నారని తెలుస్తోంది. నిజానిజాలేమిటో ఈ చిత్రం రైట్స్ కొనుగోలు చేసిన వారే తెలియజేయాలి.