అఖిల్‌ రిలీజ్ చేస్తే మాత్రం ఆడుతుందా?

నటించిన సినిమా ఇంకా విడుదల కాకముందే అఖిల్ ను స్టార్ హీరోని చేసిపారేస్తున్నారనిపిస్తోంది. విడుదలకు ముందు జనాల్లోకి తీసుకెళ్లి బాగా పాపులర్ చేసిన నాగ్ అఖిల్ ను ఎలాగైనా ఓ రేంజ్ కి తీసుకెళ్దామని ప్రయత్నాలు ప్రారంభించాడు. ఇందులో భాగంగా స్టార్ డైరక్టర్ వినాయక్ తోనే మొదటి చిత్రాన్ని తీయించేశాడు. అఖిల్ వచ్చే వారం విడుదల కానుంది. ఈ నేపథ్యంలో ప్రచారం హడావుడి మొదలెట్టేశాడు. ఇక సందులో సడేమియా అన్నట్లు మరో యువహీరో అక్కినేని క్రేజ్ ను వాడేసుకుందామని చూస్తున్నాడు.

కాళిదాసు, కరెంట్‌, అడ్డా వంటి చిత్రాలతో జనాలకు పరిచయమైన సుశాంత్ కి హిట్ లేదనే చెప్పాలి. యాక్టింగ్, ఫేస్ వాల్యూ తప్ప అన్ని కూడా ఇతగాడు హిట్ కోసం కాదు కాదు యావరేజ్ కోసం పడరాని పాట్లు పడుతున్నాడు.  స్వంత బ్యానర్ సపోర్ట్ తో వరుస చిత్రాలు కానిస్తున్న రెండేళ్ల విరామం తర్వాత మరో చిత్రంతో మన ముందుకు వస్తున్నాడు. కామెడీ చిత్రాల దర్శకుడు జి నాగేశ్వరరెడ్డి దర్శకత్వంలో ఆటాడుకుందాం రా ఓ చిత్రంలో నటించాడు. అఖిల్‌ 'సిసింద్రీ' చిత్రంలో ఫేమస్ సాంగ్ ను టైటిల్ గా వాడుకుంటున్న సుశాంత్, ఆ చిత్రాన్ని అఖిల్ తోనే ప్రమోట్ చేయించాలని చూస్తున్నాడు. ఇందులో భాగంగా ఫస్ట్ లుక్ ను అఖిల్ చేత గ్రాండ్ గా ఓపెన్ చేయించాడు. అంతేనా ఏదో స్టార్ హీరో తన చిత్రాన్ని ప్రమోట్ చేసిన రేంజ్ లో ఫీలయిపోతున్నాడు సుశాంత్. కనీసం ఇలాగైనా కలిసొచ్చి చిత్రంకి ఫ్రీ పబ్లిసిటీ వచ్చి జనాలు చూస్తారేమో అని భావిస్తున్నాడేమో. ఒక్క చిత్రం కూడా విడుదలకాకముందే అఖిల్ స్టార్ అయిపోవడమేంటో? అయినా అఖిల్ విడుదల చేసినంత మాత్రానా జనాలు ఎగబడి చూసేయరుగా. మన దగ్గర కూడా కంటెంట్ కూడా ఉండాలి గదా సుశాంతా?