ఇటీవల ఎవడే సుబ్రహ్మణ్యంతో ఓ హిట్ ఇచ్చిన నాని మళ్ళీ భలే భలే మగాడివోయ్ తో తెరమీదకు రాబోతున్నాడు. లావణ్య త్రిపాఠి హీరోయిన్ గా చేసిన ఈ సినిమా పోస్టర్లకు, మోషన్ పోస్టర్ కు మంచి రెస్పాన్స్ వచ్చింది. ఈ చిత్రం ఇప్పుడు ఎక్కువ భాగం చిత్రీకరణ పూర్తి చేసుకుని, ఆగస్టు 15 స్వాతంత్య్ర దినోత్సవ కానుకగా ఆడియో రిలీజ్ చేయబోతున్నారు. దర్శకుడు మారుతి ఆహ్వానం మేరకు ఈ ఆడియో వేడుకకు మెగాస్టార్ చిరంజీవి ముఖ్య అతిధిగా విచ్చేస్తున్నారని సమాచారం. మెగాస్టార్ ఆడియో సీడీల్ని ఆవిష్కరించి, నాని, మారుతిలను ఆశీర్వదించనున్నారు. అంత పెద్ద హీరో ఈ కార్యక్రమానికి రావడంపై ఏదో విశేషం ఉండే ఉంటుందని అనుకుంటున్నారు. ఇప్పుడున్న హీరోల్లో నాని స్వయంకృషితో ఎదిగిన హీరో. అలాగే దర్శకుల్లో మారుతి కూడా స్వయంకృషితోనే ఎదిగాడు. అయితే మెగా స్టార్ కూడా అలాంటి వారే కాబట్టి... ఈ వేడుకకు రావడానికి సమ్మతి తెలిపినట్టు అనుకుంటున్నారు. నాని కెరీర్ ఇప్పుడు బాగానే ఉన్నప్పటికీ చాలా ఒడిదుడుకులనే ఎదుర్కొన్నట్టు చెబుతుంటాడు. అలాగే మారుతి కూడా మంచి కాన్సెప్టులతో కొత్తదనం, వెరైటీ కోరుకునే దర్శకుడు. స్టార్ దర్శకుల స్థాయికి ఎదగాలనుకునే చిన్న దర్శకుడు. ఈ ఇద్దరి కాంబినేషన్ లో వస్తున్న భలే భలే మగాడివోయ్ టైటిల్ కి తగ్గట్టే కామెడీ రొమాంటిక్ ఎంటర్ టైనర్. ఇందులో నాని సరసన లావణ్య త్రిపాఠి కథానాయికగా నటించింది. మలయాళ సంగీతదర్శకుడు గోపిసుందర్ ఈ చిత్రానికి సంగీతం అందించాడు. బెంగళూర్ డేస్, మళ్లీ మళ్లీ ఇది రాని రోజు చిత్రాలతో అతడికి సంగీతదర్శకుడిగా పేరొచ్చింది కాబట్టి తాజా సినిమా ఆడియో కూడా హిట్టవుతుందనే అంచనాలున్నాయి. ఏదేమైనా మెగాస్టార్ విచ్చేస్తున్న ఈ తరుణంలో నాని సినిమాకి మెగాభిమానుల్లోన అండదండలూ ఉండవచ్చని అనుకుంటున్నారు. ఈ సపోర్ట్ తో నాని మరో హిట్ కొట్టాలని ఆశిద్దాం..
.jpg)
