గోపీ చంద్ ‘సౌఖ్యం’ ఎవరి కోసం

మొదటి సినిమా హీరోగా చేసినా తరువాత తేజా సినిమాల్లో పవర్ ఫుల్ విలన్ గా నటించి, ఇక ఈయనగారు విలన్ గా సెటిలైపోవాల్సిందే అనుకున్నారంతా. కానీ ఆ తరువాత సినిమాలన్నీ గోపీ చందర్ హీరోగానే చేస్తూ... సక్సెస్ అవుతూ వచ్చాడు. ఈ కెరీర్ లో సక్సెస్ సినిమాలు చాలానే జమయ్యాయి. ఇప్పుడు నలుగురి సంతోషం కోసం పాటు పడే వ్యక్తిగా మరో క్యారెక్టర్ లో ‘సౌఖ్యం’ సినిమాతో తెరమీదకు రాబోతున్నాడు. హీరో అంటే నలుగురి కోసం పాటు పడే వ్యక్తిగానే ఎక్కువగా మన తెలుగు సినిమాల్లో కనిపిస్తారు. ఇందులో పెద్దగా వెరైటీ ఏమీ లేదు. కానీ ఇందులో ఏమైనా వైవిధ్యంగా చూపించబోతున్నారా? అనేదే సస్పెన్స్. ‘సాహసం’, ‘లౌక్యం’, ‘జిల్’ హ్యాట్రిక్ విజయంతో ఫుల్ జోష్ లో వున్న గోపీచంద్.. ప్రస్తుతం ఎ.ఎస్. రవికుమార్ దర్శకత్వంలో రూపొందుతున్న ఓ సినిమాలో నటిస్తున్నాడు. భవ్య క్రియేషన్స్ పతాకంపై వి. ఆనంద ప్రసాద్ నిర్మిస్తున్న ఈ చిత్రానికి ‘సౌఖ్యం’ టైటిల్‌ను ఖరారు చేశారు. తొలుత ఈ మూవీ టైటిల్ కి సంబంధించి గతంలో కొన్ని ప్రచారాలు జరిగాయి కానీ.. వాటిలో ఏమాత్రం వాస్తవం లేదని యూనిట్ పేర్కొంది. ఇంకా టైటిల్ ఖరారు కాలేదని అప్పట్లో దర్శకనిర్మాతలు చెప్పారు. తాజాగా కొన్ని టైటిల్స్ ని పరిశీలించిన అనంతరం ‘సౌఖ్యం’ ఫిక్స్ చేసినట్లు వెల్లడించారు. ఈ సినిమాలో హీరోకి హెల్పింగ్ నేచుర్ ఎక్కువగా వుంటుంది కాబట్టి.. స్టోరీకి తగ్గట్టే ఆ టైటిల్ ని ఖరారు చేసినట్లు చెబుతున్నారు. ఈ సినిమాలో గోపీచంద్ సరసన రెజీనా హీరోయిన్ గా నటిస్తోంది. ఈ సినిమాగురించి నిర్మాత ఆనంద్ ప్రసాద్ మాట్లాడుతూ.. ‘‘మనుషుల మధ్య అనుబంధాలను స్పృశించే సినిమా ఇది. రవికుమార్-గోపీచంద్ కాంబినేషన్‌లో వచ్చిన  ‘యజ్ఞం’ ఎంత మంచి హిట్ అయిందో తెలిసిందే. దాదాపు పదేళ్ల తర్వాత ఈ కాంబినేషన్‌లో రూపొందుతున్న ఈ చిత్రంపై భారీ అంచనాలు ఉంటాయి. ఆ అంచనాలను చేరుకునే విధంగా ఈ చిత్రం ఉంటుంది. టాకీ పూర్తయ్యింది. ఈ నెల 26 నుంచి వచ్చే నెల 7 వరకు విదేశాల్లో మూడు పాటల చిత్రీకరిస్తాం. ఆ తర్వాత హైదరాబాద్‌లో రెండు పాటలను చిత్రీకరిస్తాం. డిసెంబర్ 25న చిత్రాన్ని విడుదల చేయనున్నాం’’ అన్నారు. ఇక దర్శకుడు రవికుమార్ మాట్లాడుతూ.. ‘‘పదేళ్ల తర్వాత గోపీచంద్‌తో వర్క్ చేయడం ఆనందంగా ఉంది. గోపీచంద్, రెజీనా మధ్య కెమిస్ట్రీ ప్రేక్షకులను ఆకట్టుకుంటుంది’’ అని తెలిపారు. ఈ చిత్రానికి స్ర్కీన్ ప్లే కోనవెంకట్, గోపీమోహన్ సంయుక్తంగా అందిస్తుండగా.. అనూప్ రూబెన్ పాటలు అందిస్తున్నాడు.