సుమంత్ అశ్విన్ కొలంబస్ కబుర్లు

హీరోల తనయులు హీరోలు, దర్శకుల తనయులు దర్శకులు, నిర్మాతల తనయులు నిర్మాతలు కావడం లేదండీ... అందరి సుపుత్రులు హీరోలవ్వాలనే ఆశ పడుతున్నారు. హీరోల కొడుకులు స్టార్ హీరోలు అవుతున్నారు తప్ప మిగిలిన వారంతా కిందామీదా పడి ఓ మోస్తరు హీరోలు అనిపించుకుంటున్నారు. అలా సుమంత్ అశ్విన్ కూడా హీరోగా ఎంట్రీ ఇచ్చాడు మొదటి సినిమా తండ్రి దర్శకత్వంలో తూనీగ తూనీగ తో టాలీవుడ్ లో ఎంటరైనా అది బాక్సాఫీస్ వద్ద అంతగా సక్సెస్ సాధించలేకపోయింది. ఆ తరువాత అంతకుముందు ఆ తరువాత వచ్చిన సినిమా సక్సెస్ కొట్టాడు... మళ్ళీ తరువాత మరో రెండు లవర్స్, కేరింతతో సక్సెస్ సాధించాడు. ఇప్పుడు కొలంబస్ తో మళ్ళీ వచ్చేస్తున్నాడీ హీరో. మంచి కథలు, పాత్రలు ఎంపిక చేసుకుంటున్న ఈ యువహీరో ప్రస్తుతం నటించిన చిత్రం ‘కొలంబస్’. డిస్కవరీ ఆఫ్ లవ్ అనేది ఉపశీర్షికతో ఏకేఎస్ ఎంటర్ టైన్ మెంట్స్ పతాకంపై ఆర్. సామల దర్శకత్వంలో అశ్వనీ కుమార్ సహదేవ్ నిర్మించారీ చిత్రాన్ని.
హీరో సుమంత్ ‘కొలంబస్’ గురించిన కబుర్లు చెపుతూ – ”లవర్స్, కేరింత.. విజయాల తర్వాత నేను చేసిన చిత్రం ఇది. కథ విని, వెంటనే అంగీకరించాను. అంతగా ఈ కథ నన్ను ఎగ్జయిట్ మెంట్ కి గురి చేసింది. ఎంటర్ టైన్ మెంట్ తో పాటు ఎమోషన్స్ కు కూడా ప్రాధాన్యం ఉన్న కథ. అందుకే కనెక్ట్ అయిపోయాను. యూత్ తో పాటు ఫ్యామిలీ ఆడియన్స్ కి కూడా నచ్చుతుంది. నా పాత్ర చాలా భిన్నంగా ఉంటుంది. ఇందులో నా సరసన ‘రన్ రాజా రన్’ ఫేం సీరత్ కపూర్, ‘చిన్నదాన నీ కోసం’లో చేసిన మిస్తీ చక్రవర్తి కథానాయికలుగా నటించారు. ‘ఇష్క్’ సినిమాకి రచయితగా పని చేసిన ఆర్. సామల ఈ చిత్రం ద్వారా దర్శకునిగా పరిచయమవుతున్నారు. నిర్మాత సహదవ్ క్వాలిటీ విషయంలో ఎక్కడా రాజీపడలేదు. జితిన్ మంచి పాటలు ఇచ్చారు. ఇది రొమాంటిక్ మ్యూజికల్ ఎంటర్ టైనర్. సీన్స్ అన్నీ ఫ్రెష్ గా ఉంటాయి. షూటింగ్ పూర్తయ్యింది. ప్రస్తుతం పోస్ట్ ప్రొడక్షన్ కార్యక్రమాలు జరుగుతున్నాయి. అక్టోబర్ లో పాటలను, నవంబర్ మొదటి వారంలో సినిమాని విడదల చేయాలనుకుంటున్నాం” అని చెప్పారు. ఈ చిత్రానికి సంగీతం: జితిన్, కెమెరా: భాస్కర్ సామల, ఎడిటింగ్: కె.వి. కృష్ణారెడ్డి.