జగపతిబాబు-ఎన్టీఆర్ మధ్య వార్?

మంచి నటులను సినీ పరిశ్రమ వదిలి పెడుతుందా? ఏదో ఒక రకంగా వారిని తమ సినిమాల్లో కనిపించేలా చేసుకోదూ? వారి కోసం ప్రత్యేక పాత్రలనూ సృష్టించేస్తుంటారు. అలాంటి నటులెందరో మన పరిశ్రమలో కనిపిస్తూనే ఉన్నారు. కొందరు హీరోగానో, హీరోయిన్ గానో కనిపించి ఇతర క్యారెక్టర్లలో కనిపించడం ఇష్టంలేక నో చెప్పేసి, ఫీల్డులో కనిపించకుండా పోయిన వారూ ఉన్నారు. మనమేం దేవతలం కాదు కదా పెరుగుతున్న వయసును ఆపడానికి. ‘నేను అక్కగా నటించను, అమ్మగా ససేమిరా... అంటే ఎలా? అమ్మలు, అమ్మమ్మలు కాకుండా పోరు కదా? ఇంతకీ ఈ ఉపోద్ఘాతం ఎందుకంటే హీరో జగపతి బాబు క్యారెక్టర్ ఆర్టిస్టుగా మారిపోవడం గురించి... ఇప్పుడు ఆయన కోసం ప్రత్యేక పాత్రలు కూడా క్రియేట్ చేస్తున్నారట. నిజానికి ఆయన హీరోగా ఉన్నప్పటి నుంచే కొన్ని ప్రత్యేక పాత్రలు చేస్తూ వస్తున్నారు. ‘అంత: పురం’ సినిమా చూసిన వారెవరైనా జగపతి బాబును మర్చిపోగలరా? ‘లక్ష్యం’లో హీరో అన్నగా ఆయన పవర్ ఫుల్ రోల్ గుర్తిండిపోదా? అనుకోకుండా ఒక రోజులో ఒక డిగ్నిఫైడ్ పోలీస్ ఆఫీసర్ గా... కొత్తగా విలన్ క్యారెక్టర్ లో ‘లెజెండ్, లింగా’లో కనిపించారు. ఇవన్నీ ఆయన ఇమేజ్ ను పెంచేవే గానీ, ఏ మాత్రం తగ్గించేవి కావు కదా? అయితే వచ్చిన అన్నిటినీ ఆయన ఓకే చేయడం లేదు, ఆయన ఇమేజ్ కు తగిన విధంగానే ఎంపిక చేసుకుంటున్నారు. ఈ క్రమంలో తాజాగా ఎన్టీఆర్ నటించే సినిమాలో ఓ పవర్ ఫుల్ క్యారెక్టర్ లో జగపతి బాబు చేస్తున్నట్టు వార్తలు వినిపిస్తున్నాయి. సుకుమార్ దర్శకత్వంలో బీవీఎస్ ప్రసాద్ నిర్మించే ఈ చిత్రం షూటింగ్ త్వరలో ప్రారంభించ బోతున్నారట.