ప్రముఖ సినీ హాస్య నటుడు కళ్లు చిదంబరం కన్నుమూశారు. గత కొంత కాలంగా ఆయన అనారోగ్యంతో బాధపడుతున్నారు. విశాఖపట్నంలోని ఓ ప్రైవేటు ఆసుపత్రిలో ఆయన తుదిశ్వాస విడిచారు. చివరకు ఆయనను బ్రతికించడానికి వైద్యులు చేసిన కృషి ఫలించలేదు. తన కళ్లతోనే అన్ని రకాల భావాలను పలికించిన కళ్లు చిదంబరం... తెలుగు సినీ అభిమానుల మనసులను దోచుకున్నారు. ప్రస్తుతం ఆయన వయసు 70 సంత్సరాలు. చిదంబరం మృతి పట్ల సినీ రంగానికి చెందిన పలువురు ప్రముఖులు సంతాపం తెలిపారు. ఆయన మరణం సినీ పరిశ్రమకు తీరని లోటు అని పలువురు సినీ ప్రముఖులు అన్నారు.
కళ్లు చిదంబరం 12 ఏళ్ల పాటు నాటకరంగంలో సేవలందించారు. నాటక రంగ కళాకారుల కోసం విశాఖపట్నంలో 'సకల కళల సమాఖ్య' ఏర్పాటు చేసిన ఘనత ఆయనది. మొత్తం 1160 మందితో సకల కళల సమాఖ్య ఏర్పాటయింది. కళ్లు, పెళ్లి పందిరి, కొండవీటి దొంగ, అమ్మోరు, ఆ ఒక్కటి అడక్కు, ఎదురులేని మనిషి, చంటి, మనీ, గోవిందా గోవిందా, శ్వేతనాగు, గ్లామర్, సివంగి లాంటి వందలాది చిత్రాల్లో ఆయన తనదైన శైలిలో హాస్యాన్ని పండించారు.
.jpg)
