హనుమంతుడిపై మంచువిష్ణు ఇంటర్నేషనల్ ప్రాజెక్టు

బాహుబలి ఇచ్చిన స్ఫూర్తి కాబోలు...  తమ ఆధ్వర్యంలో ఓ ఇంటర్నేషనల్ ప్రాజెక్టుకు శ్రీకారం చుట్టబోతున్నాడు మంచు విష్ణు. నిర్మాతగా, హీరోగా అతడి కెరీర్ లో ఇది అత్యంత ప్రతిష్టాత్మకమైన సినిమా అవుతుంది. ఈ సినిమాను హనుమంతుడి జీవిత కథ ఆధారంగా తీయబోతున్నారట. భారతీయ సినీ చరిత్రలో ఈ సినిమా ప్రత్యేకంగా నిలిచిపోయేలా ఈ ప్రాజెక్టును తీర్చిదిద్దాలనుకుంటున్నాడు విష్ణు. ఈ కథకు సంబంధించి చాలా ఆసక్తికరమైన విషయాలు చెపుతున్నాడు విష్ణు. హనుమంతుడి పాత్రను ఇప్పటిదాకా చాలా పౌరాణిక సినిమాల్లో చూపించారు. కేవలం ఆంజనేయుడి పూర్తి కథతో ఇంతవరకూ సినిమా తీయలేదు. హనుమంతుడిపై ఓ యానిమేషన్ సినిమా వచ్చింది. ఇప్పుడు విష్ణు ఆ లోటును తీర్చబోతున్నాడు. ఈ సినిమాను హాలీవుడ్ స్థాయిలో తీయాలనుకుంటున్నాడు. ఇంగ్లిష్ తెలుగు తమిళ భాషల్లో తెరకెక్కే ఈ సినిమాను ఓ హాలీవుడ్ డైరెక్టర్ కు అప్పగించాలని చూస్తున్నాడు. తెలుగు తమిళ భాషల వరకు ఓ కన్సల్టెంట్ డైరెక్టర్ ను నియమించుకుంటాడట. అంతర్జాతీయ స్థాయి వీఎఫ్ ఎక్స్ టెక్నాలజీని ఈ సినిమా కోసం ఉపయోగిస్తారట. బడ్జెట్ కూడా భారీగా ఉంటుందని.. భాగస్వామ్యం కోసం హాలీవుడ్ నిర్మాణ సంస్థల్ని కూడా సంప్రదిస్తున్నాడని సమాచారం. హనుమంతుడు పుట్టినప్పటి నుంచి హిమాలయాలకు ధ్యానం కోసం వెళ్లే వరకు ఆయన జీవితంలోని అన్ని కోణాల్ని స్పృశించబోతున్నారట ఈ సినిమాలో. ఇండియన్ మైథాలజీని ఇంటర్నేషనల్ లెవల్ లో తెరకెక్కించాలనుకుంటున్న విష్ణు ఆలోచన ఫలించాలని కోరుకుందాం...