అక్కినేనివారికి అచ్చోచ్చిన వేషాలే!

నాగ్ అప్ కమింగ్ మూవీ సోగ్గాడే చిన్నినాయన విడుదల సమయం దగ్గరపడుతూ వుండటంతో అభిమానుల్లో అంచనాలు పెరుగుతున్నాయి. ఇప్పటికే ట్రైలర్ లో సొగ్గాడి సత్తా చాటిన నాగ్ ద్విపాత్రాభినయంలో చించేసినట్లు తెలిసిపోతుంది. పక్కా పల్లెటూరి నేపథ్యంలో తెరకెక్కుతున్న ఈ చిత్రంలో... ఓవైపు తండ్రి పాత్రలో తన రెగ్యులర్ క్యారెక్టర్ చిలిపితనంతోపాటు అమాయకుడి పాత్రలో నాగ్ నటన ఆకట్టుకునేలా ఉంది. ఇక ఇప్పుడు రెండు పాత్రల తీరుతెన్నులు తెలుసుకోవాలనే ఆసక్తి పెరుగుతోంది. ఈ సినిమాకు సంబంధించిన పోస్టర్లను,  ట్రైలర్స్ ను చూసినవారికి ఇప్పటికే కొంచెం విషయం అర్థమయ్యే వుంటుంది.

పాత్ర స్వభావాల విషయానికొస్తే... తండ్రి షోకిల్లా రాయుడు, జల్సా పురుషుడు. అమ్మాయిలు కనిపిస్తే చాలు సరసాలు మొదలెట్టేస్తాడు. సరదాగా ఊరంతా సందడి చేస్తూ వుంటాడు. ఇక కొడుకు రాముడు మంచి బాలుడు టైపు. తండ్రి ఎంత స్టైల్ గా .. రఫ్ గా ఉంటాడో, కొడుకు అంత సున్నితమైన మనస్తత్వంతో నిదానమే ప్రధానమనే మాటకి నిర్వచనంలా కనిపిస్తాడని తెలుస్తోంది. అంటే ఒక పాత్ర మాస్ టచ్ గాను .. మరో పాత్ర క్లాస్ టచ్ తోను కనిపిస్తూ ఉంటుందన్న మాట. ఈ రెండు పాత్రల్లో నాగ్ నటన అదుర్స్ అని సినిమా యూనిట్ చెబుతోంది. అక్కినేనివారికి కాస్త సరదా కాస్త చిలిపితనంతో కూడిన రొమాంటిక్ పాత్రలంటే కొట్టిన పిండి, అలాంటిది షోకిల్లా రాయుడిగా నాగ్ సందడి ఈ సంక్రాంతికి మాములుగా ఉండదనేది క్లియర్ గా తెలిసిపోతుంది.