నానికి లేని నొప్పి మనకెందుకు?

తెలుగు రాష్ట్రాల్లో అభిమానుల సందడి ఎక్కువగా ఉన్న హీరో నందమూరి బాలకృష్ణ. హిట్ ఫ్లాపుల‌తో సంబంధం లేకుండా బాక్సాఫీస్ ను ఆయన రూల్ చేస్తున్నాడంటే కారణం అభిమానుల అండా దండా.  అభిమానులే ఆయనకు పెద్ద బ‌లం. అలాంటి బాలయ్య ను వాడుకోవాల్సింది పోయి పక్కన పెట్టేస్తున్నాడు ఓ యువహీరో. ఈ పాటికి అర్థం అయి ఉంటుంది ఎవరో. భలే భలే మగాడివోయ్ తో బ్లాక్ బస్టర్ కొట్టి హీరోగా తన రేంజ్, రెమ్యునరేషన్ అమాంతం పెంచేసుకున్నాడు. ఇక ఇప్పుడు కృష్ణగాడి వీర ప్రేమగాథగా మన ముందుకు రాబోతున్నాడు. అందాల రాక్షసి దర్శకుడు హను రాఘవపూడి తెరకెక్కించిన ఈ చిత్రంలో మెహ్రీన్ నాయిక.

ఈ సినిమాలో బాలయ్య వీరభిమానిగా నాని నటించనున్నాడన్నది తెలిసిందే. అంతేకాదు ముందు అసలు జై బాలయ్య అనే టైటిల్ అనుకుని డ్రాప్ అయ్యారు కూడా. ట్రైలర్ లో, టీజర్లో కూడా చేతిపై టాటూతో నాని బాగా సందడి చేశాడు. కానీ, ఇంత చేస్తున్న ప్రమోషన్లో మాత్రం ఎక్కడా బాలయ్య పేరును వాడుకోవట్లేదు. పైగా ఈ సినిమా షూటింగ్ కూడా హిందూపూర్ లో జ‌రిగింది. బాల‌య్య నియోజకవర్గం లో సినిమా షూటింగ్ జరిగినప్పటికీ ఇప్పటిదాకా ఆయన ఇమేజ్ ఎందుకు వాడుకోవట్లేదో అర్థం కావట్లేదు. పోనీ బాలయ్య ఏమన్నా అబ్జెక్షన్ చెప్పాడా అంటే 14 రీల్స్ తో ఆయనకు అవినాభావ సంబంధం ఉంది. అయితే టైటిల్ పై అస్సలు సూట్ కాదంటూ వివరణ ఇచ్చిన నాని  చిత్రంలో తాను బాలయ్య అభిమాని అవునా కాదా? అన్నది మాత్రం చెప్పటంలేదు. మరో నాలుగు రోజుల్లో చిత్రం విడుదల కానున్న నేపథ్యంలో దీనిపై ఎలాంటి స్పందన లేనప్పుడు  టాటూ, అభిమాని అనే గోల మనకు ఎందుకు చెప్పండి. మొత్తానికి ప్రీ బిజినెస్ 20 కోట్లు జరుపుకుని మాత్రం సంచలనాలకు తెరలేపాడు నాని.