పవర్ స్టార్ పెద్ద షాకివ్వనున్నాడా?

పవర్ స్టార్ తో సినిమా అంటే చాలు ఏ దర్శకుడైనా తమ పంట పండిందనుకుంటారు. వంద సినిమాలు చేసినా రాని క్రేజ్ పవన్ తో ఒక్క సినిమా చేసినా చాలు అనుకునేవారి లిస్ట్ చాంతాడంతే ఉంది. అయితే తన కోసం ఎంతో మంది బడా దర్శకులు వెయిటింగ్ లిస్ట్ లో ఉంటే పవన్ మాత్రం ఆశ్చర్యపరిచేలా ఓ నిర్ణయం తీసుకున్నాడని తెలుస్తోంది. తనని డైరెక్ట్ చేసే అవకాశాన్ని ఓ కొరియోగ్రాఫర్ కి ఇవ్వబోతున్నాడన్న వార్తలు గుప్పుమంటున్నాయి. రచ్చ, ఎవడు, రేసుగుర్రం, జులాయి... వంటి సినిమాలలో కొత్త తరహా డ్యాన్సులను కంపోజ్ చేసిన జానీ మాస్టర్ కు పవన్ డైరెక్షన్ ఛాన్స్ ఇస్తున్నట్టుగా తెలుస్తోంది. జానీ మాస్టర్ కి మొదటి నుంచే మెగా ఫ్యామిలీతో మంచి చనువు ఉంది. అంతేకాదు ఇటీవలె పవన్ ను కలసి కథ కూడా వినిపించాడని, అది పవన్ కు బాగా నచ్చిందని తెలుస్తోంది. అవసరమైతే దాసరి నిర్మించే చిత్రానికి జానీని రికమెండ్ చేయనున్నట్టు ప్రచారం జరుగుతోంది.

వ్యక్తిగతంగా సేవ చేయడంలో పవన్ కళ్యాణ్ ఎంత మంచివాడో.. ఇండస్ట్రీలో పైకి ఎదిగేందుకు ప్రయత్నిస్తున్నవారికి అవకాశాలు కల్పించడంలోనూ ముందుంటాడని తెలిసిందే. ఇప్పటికే ఎంతోమందికి సహాయం చేసి, ఇండస్ట్రీలో వారికో స్థానం దక్కేలా చేశాడు. ఇప్పుడు తాజాగా మరో కొరియోగ్రాఫర్‌కి ఓ పెద్ద ఆఫర్ ఇచ్చి.. తనలో దాగిన మంచితనాన్ని పవన్ మరోసారి చాటుకున్నాడని చెప్పుకుంటున్నారు. ఒకవేళ అదే నిజమైతే పవన్ స్టార్ డైరక్టర్లకు ఇచ్చే షాక్ మాములుగా ఉండదు.