అభిమానులకోసం దేవుడ్ని ప్రార్థించా....

ఎంత కాలంగానో ఎదురు చూసిన ’గోపాల గోపాల‘ ఆదియో ఫంక్షన్ ఆదివారం కోలాహలంగా జరిగింది. ఈ కార్యక్రమంలో పవర్ స్టార్ పవన్ కళ్యాణ్, విక్టరీ వెంకటేష్ తో పాటు సినిమా ప్రముఖులంతా విచ్చేశారు. కార్యక్రమంలో పాల్గొన్న వెంకటేష్ మాట్లాడుతూ... సినిమాలో తనది చాలా సింపుల్ క్యారెక్టర్ అన్నారు. పవన్ తో సినిమా చేయాలనుకున్న తన కోరిక ఈ సినిమాతో తీరిందన్నారు. పవన్ సినిమా చేసేందుకు ఒప్పుకున్నాడని తెలియగానే చాలా సంతోషం కల్గిందన్నారు. తన అభిమానులు విక్టరీ అందిస్తే, పవన్ అభిమానులు పవర్ చూపిస్తారని.. ఇద్దరి ఫ్యాన్స్ కలిపి ఈ సంక్రాంతికి పవర్ ఫుల్ విక్టరీ అందిస్తారని చెప్పారు. ఆడియో రిలీజ్ లో మాట్లాడిన పవర్ స్టార్, ఉద్వేగానికి లోనయ్యారు. ఫ్యాన్స్ తనపై చూపిస్తున్న అభిమానానికి ఆనందంతో పొంగిపోయారు. నా గుండెనిండా అభిమానులే ఉన్నారు. నేనెప్పుడూ దేవుడ్ని ఏది కోరలేదు. కానీ కొందరు ఫ్యాన్స్ వచ్చి ఒక్క హిట్ సినిమా ఇవ్వు అని కోరటంతో.., అది కావాలని దేవుడిని ప్రార్థించాను. అది గబ్బర్ సింగ్ తో తీరింది. నాకు కథలు ఎంపిక చేయటం రాదని కొందరు చెప్తారు కానీ... కథలు ఎలా ఎంచుకోవాలో ఇండస్ట్రీకి వచ్చిన మొదట్లోనే అన్నయ్య చిరంజీవి నేర్పించాడనగానే, అభిమానులు ఆనందంతో ఈలలు వేశారు. పవన్ నోట అన్నయ్య మాట వినడం వీరిద్దరూ దూరమయ్యారని భావిస్తున్న కొందరిలో ఉత్సాహం ఉరకలెత్తింది. అనూప్ పాటలు బాగా వచ్చాయని మెచ్చుకున్నారు ‘గబ్బర్ సింగ్2’ సినిమాకు కూడా అనూప్ సంగీతం అందిస్తాడని చెప్పారు.