బడా హీరోలు బుక్ చేసుకుంటున్నారు

టాలీవుడ్ సూపర్ స్టార్, అందగాడు మహేష్ బాబు తో సినిమా అంటే ఏ హీరోయిన్ ఒప్పుకోదు చెప్పండి. కనీసం ఆయన సినిమాలో ఓ చిన్న రోల్ దొరికితే అదే చాలు అనుకునే నటీమణులు ఎందరో ఉన్నారు. అలాంటి ఛాన్స్ దక్కింది ఇప్పుడు ఓ చిన్న హీరోయిన్ కి. ఇటీవల వరుణ్ తో జోడీగా కంచెలో నటించింది ప్రగ్యా జైస్వాల్. ఆ సినిమా ఇప్పుడు పెద్ద హిట్ అయి కూర్చుంది. అసలు ముందు ఆమె మిర్చి లాంటి కుర్రాడు అనే ఓ చిన్న చిత్రంతో ప్రేక్షకుల ముందుకు వచ్చింది. అయితే ఆ సినిమా ఎవరూ పెద్దగా పట్టించుకోకపోవటంతో ప్రగ్యా పని అంతే అనుకున్నారు. కానీ, క్రిష్ కళ్లలో పడటం, ఆ వెంటనే కంచెకు తీసేసుకోవటం జరిగిపోయాయి. ఇక కంచెలో ఆమె నటనకు అటు ప్రేక్షకుల నుంచి, ఇటు ప్రముఖుల నుంచి ప్రశంసలు అందాయి. దీంతో ఏకంగా మహేష్ బాబుతో నటించే అవకాశం ఆమెకు దక్కినట్లే అని ఫిల్మ్ నగర్ వర్గాల సమాచారం.

బ్రహోత్సవం తర్వాత మురుగదాస్ - మహేశ్ బాబు కాంబినేషన్లో ఓ చిత్రం తెరకెక్కనున్నట్లు సమాచారం.  తెరకెక్కనున్న ఓ సినిమాలో కథానాయికగా ఆమెని ఎంపిక చేశారనే వార్త కూడా షికారు చేసింది. అయితే ఇంతవరకూ ఈ సినిమా విషయంగా తనని ఎవరూ సంప్రదించలేదని ప్రగ్యా చెబుతోంది. మహేశ్ జోడీగా అవకాశం లభిస్తే అంతకి మించిన అదృష్టం లేదని అంటోంది. అలాంటి అవకాశం వస్తే, తన కల నిజమైనట్టేనని చెప్పుకొచ్చింది ఈ కంచె భామ. ఇక ఫ్రెష్ లుక్ ఉండటంతోపాటు మంచి నటనను కనబరిచిన ఆమెను మరి కొందరు అగ్రహీరోలు కూడా తదుపరి సినిమాల్లో నటించేందుకు బుక్ చేసుకుంటున్నట్లు సమాచారం.