‘పులి’కి విడుదల కష్టాలు...?

భారీ బడ్జెట్ తో ప్రతిష్టాత్మకంగా నిర్మించిన ఇళయదళపతి ‘పులి’ సినిమా ఈ రోజు విడుదల కావాల్సి ఉండగా, ఇప్పటి వరకూ మార్నింగ్ షోలు మాత్రం ఆడలేదు.  ఇక మ్యాట్నీలు కూడా పడకపోవచ్చన్న అనుమానాలు వ్యక్తమవుతున్నాయి. పులి అడ్డంకులు సమస్యలు తొలగిపోయినట్టు సోషల్ మీడియాలో వస్తున్నప్పటికీ... మార్నింగ్ షోలు మాత్రం ఆగిపోయాయి. నిన్న సాయంత్రం మొదలైన చర్చలు అర్ధరాత్రి తర్వాత ఓ కొలిక్కి వచ్చాయని అన్నప్పటికీ మార్నింగ్ షోలు పడకపోవడానికి కారణాలు తెలియ రాలేదు. కోలీవుడ్ లో మాత్రం ఎర్లీ మార్నింగ్ షోలు పడలేదు గానీ, ఉదయం 9 గంటల షోలు పడ్డాయట.  అక్కడ 9 గంటల ఆట నడిచినప్పుడు కనీసం ఇక్కడ మార్నింగ్ షోలు ఆడతాయనుకున్నారు. కానీ ఎందుకు ఆగిపోయాయన్న దానికి మాత్రం స్పష్టత ఇవ్వడం లేదు. నిన్న పులికి సంబంధించిన యూనిట్ మొత్తం మీద ఐటీ దాడులు జరిగాయని ఓ వార్త వచ్చింది ఈ వార్తకు, సినిమా విడుదల కాకపోవడానికి లింక్ ఏమైనా ఉందా అని కొందరు అనుమానం వ్యక్తం చేస్తున్నారు. మధ్యాహ్నం షోలయినా పడతాయా లేదా అని  పలువురు థియేటర్లకు ఫోన్ చేసి అడుగుతున్నారు.  కానీ ఎవరూ కూడా సరైన సమాధానం ఇవ్వలేకపోతున్నారు. ఇలాంటి సంఘటనే కమల్ హాసన్ ‘విశ్వరూపం 2’ విషయంలో జరిగింది. ఆ సినిమా రెండో రోజు సాయంత్రానికి విడుదల చేశారు. ఇప్పుడు పులి కూడా ఇలాంటి సమస్యే ఎదుర్కొంటోంది. ఈ సినిమా ఎప్పటికి రిలీజ్ చేస్తారనేది వేచి చూడాల్సిందే.