శిల్పాశెట్టి రేడియో జాకీ అవతారం

బాలీవుడ్ హీరోయిన్ శిల్పాశెట్టి అడుగు పెట్టని రంగమేదైనా ఉందా? తను ఆల్ రౌండర్ గా చలామణి అయ్యింది. తను ఇపుడు మరో కొత్త అవతారంలో అభిమానులను అలరించేందుకు సిద్ధం అవుతోంది.   ప్రముఖ వ్యాపారవేత్త రాజ్ కుంద్రాను పెళ్లి చేసుకున్న తారువాత బిగ్ స్క్రీన్ నుంచి తప్పుకొని 2007లో 'సెలబ్రిటి బిగ్ బ్రదర్'లో ప్రత్యక్షమై ఇటు భారతీయ ప్రేక్షకులతోపాటు అటు లండన్ ప్రేక్షకులను తనవైపు తిప్పుకుంది.  అభిమానులను ఆకట్టుకోవడంలో తన స్టైలే వేరని నిరూపించుకున్న శిల్పాశెట్టి  ఇప్పుడు లండన్‌లో రేడియో జాకీగా  తన టాలెంట్ ను ప్రదర్శించబోతోంది. శిల్పాశెట్టి లండన్ ప్రేక్షకులకు  బాలీవుడ్‌ను బీబీసీ రేడియో 2 ద్వారా తనదైన శైలిలో సరికొత్త రూపంలో పరిచయం చేసుకోబోతోంది. ఈ కార్యక్రమం సెప్టెంబర్‌లో ప్రారంభమవుతుందని శనివారం ట్విట్టర్ ద్వారా తన అభిమానులకు తెలిపింది. ఈ సందర్భంగా రెండు ఫొటోలను కూడా ఆమె 'ది న్యూ ఆర్జే ఇన్ ది హౌస్'  పేరిట ఫొటో వెబ్‌సైట్ 'ఇన్‌స్టాగ్రామ్'లో పోస్ట్ చేసింది. శిల్పా శెట్టి తన బీబీసీ రేడియో-2 కార్యక్రమం తొలి ఎపిసోడ్‌ల కోసం అప్పుడే మెలోడీ క్వీన్ లతా మంగేష్కర్, బాలీవుడ్ ఎంటర్ టైన్‌మెంట్ మాస్టర్ కరన్ జోహర్‌తో మాటామంతి కాలిపారు.  ఇండియన్ ప్రీమియర్ లీగ్ మ్యాచ్‌లో రాజస్థాన్ రాయల్స్ జట్టుకు సహ యజమానిగావున్న ఆమె ఫిట్‌నెస్ ఎక్స్‌ పర్ట్‌ గా రాణిస్తూ  యోగాకు సంబంధించిన పలు క్యాసెట్లను రిలీజ్ చేసింది. 'స్పా, వెల్‌నెస్ సెంటర్ల చైన్'ను నిర్వహించడంతోపాటు నగల వ్యాపారంలో రాణిస్తోంది.  ఇవి చాలవన్నట్టు ఏ కొద్దిగా సమయం దొరికినా టీవీ షోల్లో జడ్జిగా దర్శనమిస్తోంది కూడా.