కొలంబస్ టీజర్ రిలీజ్...

సుమంత్ అశ్విన్ కేరింత తరువాత చేసిన సినిమా కొలంబస్. దీనికి ఉప శీర్షిక డిస్కవరీ ఆఫ్ లవ్ అట. ఈ హీరోకి యూత్ మెచ్చే లవ్ స్టోరీలే బాగా సెట్ అవుతాయి. మొదట చేసిన సినిమా తూనిక తూనిగ కూడా లవ్ స్టోరీనే అయినప్పటికీ బోల్తా కొట్టింది. ఈయన కెరీర్ లో సక్సెస్ అయిన సినిమాలంటే కేరింత, లవర్స్, అంతకు ముందు ఆ తరువాత. ఇప్పుడు కొలంబస్. నెమ్మదిగా ఈ హీరో సక్సెస్ అందుకుంటూ ఎదుగుతున్నాడు. ఏకేఎస్ ఎంటర్ టైన్ మెంట్స్ పతాకంపై ఆర్. సామల దర్శకత్వంలో అశ్వనీ కుమార్ సహదేవ్ నిర్మించిన ఈ చిత్రం షూటింగ్ ఇటీవలే పూర్తయ్యింది. ఇందులో సుమంత్ అశ్విన్ సరసన ‘రన్ రాజా రన్’ ఫేం సీరత్ కపూర్, ‘చిన్నదాన నీకోసం’ ఫేం మిస్తీ చక్రవర్తిలు హీరోయిన్లుగా నటిస్తున్నారు. ఇప్పటికే విడుదలైన ఫస్ట్ లుక్ పోస్టర్లు, స్టిల్స్ మంచి టాక్ ను సొంతం చేసుకున్నాయి. అయితే తాజాగా వినాయక చవితి సంధర్భంగా ప్రేక్షకులకు శుభాకాంక్షలు తెలియజేస్తూ ఆడియో టీజర్ ను విడుదల చేశారు. 'ఇష్క్' సినిమాకి రచయితగా పని చేసిన ఆర్. సామల ఈ చిత్రం ద్వారా దర్శకునిగా పరిచయమవుతున్నాడు. ఈ చిత్రం ఆడియోను అక్టోబర్ లో విడుదల చేయబోతున్నారు.  నవంబర్ మొదటి వారంలో సినిమాను రిలీజ్ కు సిద్ధం చేస్తున్నారు. అయితే కొలంబస్ ఇద్దరు హీరోయిన్లతో ఏం డ్రామా నడిపిస్తాడో గానీ కాలేజీ అమ్మాయిలకు తెగ నచ్చేస్తున్నాడు ఈ హీరో.