మహేష్ కెరీర్ లో నెం.1 సినిమా శ్రీమంతుడు: కృష్ణ

నిన్న ఉదయానికే (ఆగస్టు 2) శ్రీమంతుడు సినిమా బాగుందంటూ సక్సెస్ సర్టిఫికెట్ ఇచ్చేశారు ఫిల్మ్ క్రిటిక్స్, ప్రేక్షకులు కూడా.  ఇప్పుడు సామాన్య జనంతో పాటు ఇండస్ట్రీ వాళ్ళు కూడా ఈ సినిమాపై ఆసక్తి చూపిస్తున్నారు. మహేష్ బాబు సినిమా రిలీజైన ప్రతిసారీ సూపర్ స్టార్ కృష్ణ ఆ సినిమా చూసి తన అభిప్రాయాన్ని చెపుతుంటారు... అలాగే నిన్న ఈ సినిమాను సూపర్ స్టార్ కృష్ణ , విజయ నిర్మల, సీనియర్ నరేష్ తదితరులు ప్రసాద్ ల్యాబ్స్ లో స్పెషల్ షో చూశారు. అనంతరం కృష్ణ మాట్లాడుతూ సినిమా చాలా బాగుందంటూ ప్రశంసించారు. ‘‘కన్నార్పకుండా చూసేంత అద్భుతంగా సినిమా ఉంది...  సినిమాలో బాగోలేదని చెప్పడానికి ఒక్కసీన్ కూడా లేదు. సినిమా చూసిన తర్వాత 100 శాతం సంతృప్తి చెందాను. మహేష్ పెర్ఫార్మెన్స్ ఎక్స్‌ట్రార్డినరీగా ఉంది. మహేష్ కెరీర్లో నెం.1 పిక్చర్ అవుతుంది. ఈ సినిమాతో పూర్తి స్థాయి ఆర్టిస్టుగా ప్రూవ్ చేసుకున్నాడు. డైరక్షన్ చాలా బావుంది. ఈ మధ్య కాలంలో ఇంత మంచి సినిమా చూడలేదు. మహేష్ ఇలాంటి సినిమాలు మరిన్ని చేయాలి, ఇంకా ఎత్తుకు ఎదగాలి’’ అని ఆకాంక్షించారు. విజయ నిర్మల మాట్లాడుతూ ‘‘సినిమా చాలా బావుంది... ఎంతో అద్భుతంగా దర్శకుడు తెరకెక్కించాడు. సినిమాలో అనవసర సీన్లు, కావాలని పెట్టే కామెడీ లేకుండా చాలా బావుంది. కుటుంబ సమేతంగా చూడాల్సిన సినిమా ఇంది. మంచి సందేశాత్మక చిత్రం’’ అన్నారు. సీనియర్ నరేష్ మాట్లాడుతూ ‘‘మహేష్ బాబు కెరీర్లో ఇదో బ్లాక్ బస్టర్. ప్రధాన మంత్రి నరేంద్ర మోడీ ఘర్ వాపసీ నినాదాన్ని, బ్యాక్ టు విలేజ్ నినాదాన్ని ఈ సినిమా గుర్తు చేస్తుంది. దేశంలోని యువతకు ఇన్స్ స్పిరేషన్ గా ఈ సినిమా ఉంది. యువతకు రైతుల పట్ల, గ్రామల పట్ల అవగాహన ఉండాలి, తమ సంపాదనలో ఎంతో కొంత తమ సొంత గ్రామాలకు ఇవ్వాలి’’ అన్నారు.