బన్నీ కోసం బ్యాడ్ బాయ్ గా మారనున్న ఆది?

ఈ మధ్య విలన్ల ఎంపికలో వైవిధ్యతను ప్రదర్శిస్తున్నారు చిత్ర దర్శకులు. కథాకథనం ఎలా ఉన్నా... హీరో ఎంత ముఖ్యమో! దానికి తగ్గట్లు ప్రతినాయకుడి పాత్రపై కూడా ప్రత్యేక దృష్టి సారిస్తున్నారు. ముఖ్యంగా టాలీవుడ్ లో ఈ ఎంపిక ప్రక్రియ స్టైలిష్ గా సాగుతుంది. హీరోలకు ఏ మాత్రం తగ్గని రేంజ్ లో విలన్లను పట్టుకోచ్చేస్తున్నారు మన డైరక్టర్లు. అవసరమైతే పర భాషల్లోని హీరోలతో విలన్ల క్యారెక్టర్లు చేయిస్తూ జనాల్లో ఆసక్తిని రేపుతున్నారు. ఈగ సినిమా కోసం రాజమౌళి కన్నడ స్టార్ నటుడు సుదీప్ ను, రేసు గుర్రం కోసం సురేందర్ రెడ్డి భోజ్ పురి నటుడు రవికిషన్ ను తీసుకురావడం ఈ కోవలోనిదే. ఇక ఇందుకు తగ్గట్టు ఆయా నటులు కూడా తమ హీరోయిజాన్ని, ఇగోను పక్కనబెట్టి నటించి మెప్పించారు కూడా. ఇక ఇప్పుడు ఇదే వరుసలో బోయపాటి శ్రీనివాస్ అల్లు అర్జున్ తో సినిమా కోసం మరో పర బాష హీరోని ఎంపిక చేసినట్లు సమాచారం. తమిళంతోపాటు తెలుగు వారికి సుపరిచితుడైన నటుడు ఆది పినిశెట్టిని విలన్ గా సెలక్ట్ చేశారట. లెజెండ్ కోసం జగపతి బాబు లోని విలనిజాన్ని చూపిన బోయపాటి ఇప్పడు ఆ వరుసలో రవిరాజా పినిశెట్టి కొడుకును కూడా చేర్చబోతున్నాడన్న మాట. ఇక ఈ నిర్ణయానికి బన్నీ కూడా ఏ అడ్డు చెప్పలేదట. గతంలో వరుడు చిత్రం కోసం తమిళ హీరో ఆర్యను, అలాగే రేసుగుర్రం కోసం రవికిషన్ ను ఎంపిక చేయడంలో దర్శకులను ఎంకరేజ్ చేసిన బన్నీ ఇప్పుడు బోయపాటి కోసం కూడా అదే పని చేస్తున్నాడట. అసలే ఎమోషనల్ సన్నివేశాలను ఓరేంజ్ లో చూపే బోయపాటి మరి వీరిద్దరి పోరాట సన్నివేశాలను ఇంకెలా చూపుతాడో.