బాహుబలిపై గొడవకు రెడీ…

ఏదో ఒక వంకపెట్టుకుని... పనిగట్టుకొని ఆందోళన చేయడానికి ఇప్పుడు చాలా మంది రెడీగా ఉంటున్నారు. అది కూడా విడుదలైన ప్రతి సినిమాలో ఎక్కడ తప్పు దొరుకుతుందా అని చూసి మరీ రంగంలోకి దిగుతున్నారు. ఓ వందమంది కూడగట్టుకొని గొడవ చేస్తే... అది కూడా ‘కులం’ పేరుతో రచ్చ చేస్తే సినిమా వాళ్ళు భయపడడం సర్వసాధారణం.. కోట్లు కోట్లు ఖర్చు పెట్టి తీసిన సినిమా థీయేటర్లలో సక్రమంగా ఆడితేనే గదా... వాళ్ళు పెట్టిన పెట్టుబడి రాబట్టుకోగలిగేది. ప్రస్తుతం ఓ సినిమా నిర్మాణంలో ఉందంటే.. అందులోని సన్నివేశాల గురించి ఆ నోటా ఈ నోటా తెలుసుకుని, అవి వివాదాస్పదంగా అనిపిస్తే, రేపడం సాధారణం అయ్యింది. అలాగే, సినిమా విడుదలైన తర్వాత అందులో అభ్యంతరకర సన్నివేశాలుంటే వివాదం చేయడానికి కొంతమంది రెడీ అయిపోతున్నారు. తాజాగా 'బాహుబలి' కూడా వివాదంలో ఇరుక్కునేలా ఉంది.  ఆ సినిమా చూసింది లేదు... ఏముందో తెలియదు. లీకైనా ఓ వీడియోలో ఉన్నదేమిటో తెలియదు. కానీ వివాదానికి రెడీ అయ్యారు.
ఈ చిత్రంపై మాల కులస్థులు ఆగ్రహం వ్యక్తపరుస్తున్నారట. ఈ చిత్రంలో మాల కులస్థులను అవమానపరిచే విధంగా సన్నివేశాలు, డైలాగులు ఉన్నాయని, వాటిని వెంటనే తొలిగించాలని తెలంగాణా మాలల జేఎసీ చైర్మన్ బి.దీపక్ కుమార్ డిమాండ్ చేస్తున్నాడు. ఒకవేళ తొలిగించకపోతే తెలంగాణాలో సినిమాని అడ్డుకుంటామని కూడా హెచ్చరికలు జారీ చేసాడు బి.దీపక్. అంతే కాదు... దీనిపై తెలంగాణా ప్రభుత్వం స్పందించాలని కూడా ఆయన డిమాండ్ చేస్తున్నాడు. యూట్యూబ్ లో పొందుపరిచిన ఓ ట్రైలర్ లో మాలలను కించపరిచే సన్ని వేశాలు, డైలాగులు ఉన్నాయని, వాటిని పోలీసులకు అందజేసి కంఫ్లంట్ చేసామని కూడా దీపక్ తెలిపారు. దీనిపై ప్రభుత్వం, పోలీసు వారు ఎలా స్పందిస్తారో వేచి చూడాల్సిందే...