అభినయ సౌందర్యం జన్మదినం నేడు

సావిత్రి అంతటి మహా నటి మళ్ళీ పుట్టలేదనే చెప్పుకోవాలి. అవలీలగా ఆమె ముఖంలో ఎన్నో అర్థాలు పలికించగల మహా నటి ఆవిడ. ఆవిడ అంతటి మహా నటికి సమానమంటే తప్పు కానీ, అవిడ దరిదాపులకు వెళ్ళగలిగిన నటి అంటే సౌందర్య అనే చెప్పుకోవాలి. ఎన్నో సినిమాల్లో తన నటనతో ప్రేక్షకులను తన్మయులను చేసి, చిన్న వయసులోనే దివికేగిన (ఏప్రిల్ 17, 2004) తార సౌందర్య. చక్కని అందం.. దానికి తగిన అభినయం... ఆమెది. నేడు సౌందర్య జయంతి. జులై 18, 1976న ఆమె జన్మించారు. ఎన్నో సినిమాల్లో అత్యుత్తమ ప్రతిభ కనబర్చిన సౌందర్య, తెలుగు ప్రేక్షకుల మదిలో చెరగని ముద్ర వేసుకున్నారు. ఎక్స్ పోజింగ్ జోలికి వెళ్ళకుండా ఆఫర్లు దక్కించుకున్న నటి సౌందర్య అనే చెప్పుకోవాలి. తెలుగులోనే కాదు ఇతర భాషల్లోనూ అందరు టాప్ హీరోలతో నటించిన తార సౌందర్య. తెలుగులోనే కాకుండా తమిళం,కన్నడం,  మళయాలం, హిందీ భాషలలో మొత్తం కలిపి 100కు పైగా చిత్రాలలో నటించింది. 12 సంవత్సరాలు నటిగా వెలిగిన ఈమె బెంగళూరులో జరిగిన విమాన ప్రమాదంలో మరణించింది.  సౌందర్య గిరీష్ కాసరవల్లి దర్శకత్వంలో ద్వీప అనే కన్నడ చిత్రం నిర్మించింది. ఈ చిత్రం జాతీయ పురస్కారాలలో ఉత్తమ చిత్రానికి గాను స్వర్ణకమలంతో పాటు పలు పురస్కారాలు అందుకుంది. ఈ చిత్రానికి కర్ణాటక ప్రభుత్వం నుండి ఉత్తమ నటి, ఉత్తమ చిత్రం, ఉత్తమ ఛాయాచిత్రగ్రహణానికి గాను పురస్కారాలు లభించాయి. పలు అంతర్జాతీయ చిత్రోత్సవాలలో కూడా ప్రదర్శింపబడింది.