విశాల్ సీక్వెల్ లో షామిలి!

బాలనటులుగా వచ్చి హీరోయిన్ గా క్లిక్ అయిన వారు ఎందరో ఉన్నారు. వారిలో నెంబర్ వన్ అంటే శ్రీదేవిగానే చెప్పుకోవాలి. ఆ తరువాత మీనా, రాసి, శాలిని లాంటి వారు కొందరున్నారు. అయితే బాలనటిగా బాగా క్లిక్ అయిన వారిలో షామిలి పేరును చెప్పుకోవచ్చు. కానీ ఈమె హీరోయిన్ గా మాత్రం ఎదగలేకపోయింది. తెలుగులో ‘ఓయ్’ చిత్రం ద్వారా కథానాయికగా ఎంట్రీ ఇచ్చింది. ఆ తరువాత ఈమెకు ఆఫర్లేమీ రాలేదు. దీంతో నిరాశకు గురైన ఆమె.. మళ్లీ ఏ సినిమా ఒప్పుకోలేదు. కొన్నాళ్ల తర్వాత తిరిగి అవకాశాల కోసం ప్రయత్నిస్తే.. ఈమెకు ఏ ఆఫర్ దక్కలేదు. అయినప్పటికీ తన ప్రయత్నాలు కొనసాగిస్తూ వచ్చింది. ఈ క్రమంలోనే ఈమెకు హీరో విశాల్ ఓ మంచి అవకాశం ఇచ్చాడు. గతంలో విశాల్ హీరోగా నటించిన ‘పందెం కోడి’ సినిమా అటు తమిళంతోపాటు ఇటు తెలుగులోనూ మంచి విజయం సాధించిన విషయం తెలిసిందే! ఇప్పుడు ఈ సినిమాకి సీక్వెల్ తీసేందుకు విశాల్ ఫిక్స్ అయ్యాడు. ఇప్పటికే ఈ సినిమాకి సంబంధించిన అన్ని కార్యక్రమాలు దాదాపు పూర్తయ్యాయి. త్వరలోనే షూటింగ్ ప్రారంభం కానుంది కూడా! ఇక ఇందులో హీరోయిన్ కోసం ఎంతోమందిని వెతికిన మీదట షామిలిని తీసుకున్నట్లు తెలుస్తోంది. గతంలో పందెం కోడిలో చేసిన హీరోయిన్ కూడా ఇందులో ఓ ముఖ్య పాత్ర పోషిస్తోందట. ఇక షామిలికి దక్కిన ఈ ఆఫర్ వల్ల తనకు మళ్ళీ సినిమా ఛాన్సులు వచ్చే అవకాశం ఉందో లేదో వేచి చూడాల్సిందే.