రంజిత్ అనే ఓ యంగ్ డైరెక్టర్ సినిమాకు రజనీకాంత్ సైన్ చేసినట్టు ఇంతకు ముందే తెలుసుకున్నాం...
అయితే ఈ కొత్త సినిమా గురించిన సరి కొత్త సమాచారం ఏమిటంటే రజనీ సరసన హీరోయిన్‌గా విద్యాబాలన్ నటిస్తోందట. ఉత్తరాది టాప్ స్టార్ అయిన విద్యాబాలన్ తల్లితండ్రులు తమిళులు కావడం విశేషం. ఆమె సౌజ్ సినిమాల్లో నటించాలనుందని ఎప్పటి నుంచో చెపుతున్నప్పటికీ ఆమెకు ఆఫర్ ఇచ్చే సాహసం ఎవరూ చేయలేకపోయారు. ఇప్పుడు తొలిసారిగా దక్షిణాది సినిమాల్లో అవకాశం రావడం అది కూడా సూపర్ స్టార్ రజనీ సరసన నటించడం ఇది దక్షిణాది సినీ అభిమానులను ఆనందాశ్చర్యాల్లో ముంచుత్తే అంశం. తమిళంలో ఇటీవల ‘మద్రాస్’, ‘అట్ట కత్తి’ చిత్రాలతో అందరి దృష్టినీ ఆకర్షించిన రంజిత్ ఈ చిత్రానికి దర్శకత్వం వహిస్తున్నారు. ప్రముఖ తమిళ నిర్మాత ‘కలైపులి’ ఎస్. థాను నిర్మిస్తున్న ఈ సినిమా షూటింగ్ ఆగస్టు 1 నుంచి మలేసియాలో జరగనుంది. విశేషం ఏమిటంటే, రజనీకాంత్ సినిమా అనగానే ఎ.ఆర్. రెహమాన్ లాంటి సంగీత దర్శకులు, పి.సి. శ్రీరామ్ లాంటి సీనియర్ సాంకేతిక నిపుణులు పని చేస్తారని భావిస్తారు. కానీ, ఈ సారి రజనీ పూర్తిగా స్టైల్ మార్చేశారు. దర్శకుడు రంజిత్ వద్ద గత చిత్రాలకు పనిచేసిన సంగీత దర్శకుడు (సంతోష్ నారాయణన్), కెమేరామన్ (జి. మురళి) తదితరులనే ఈ సినిమాకూ కొనసాగించడానికి ఆయన ఒప్పుకున్నారు. మలేసియాలో 60 రోజుల పాటు ఈ సినిమా చిత్రీకరణ జరుపుతారని తెలుస్తోంది. ఆ తరువాత థాయిలాండ్, హాంగ్‌కాంగ్, చెన్నైలలో షూటింగ్ కొనసాగేలా ప్లాన్ చేస్తున్నారు. నిజానికి, రజనీకాంత్‌తో సినిమా చేయాలన్నది నిర్మాత ‘కలైపులి’ ఎస్. థాను చిరకాల కోరిక. రజనీకాంత్ తొలిసారిగా సోలో హీరోగా నటించిన తమిళ చిత్రం ‘భైరవి’ని 1978లో పంపిణీ చేసింది - థానుయే! ‘సూపర్‌స్టార్’ అనే బిరుదును రజనీకాంత్ పేరు ముందు తగిలించారు.
అప్పటి నుంచి ఎప్పటికైనా రజనీతో సినిమా చేయాలని థాను ఉవ్విళ్ళూరుతున్నారు. 37 ఏళ్ళ సుదీర్ఘ నిరీక్షణ తరువాత ఎట్టకేలకు ఆయన కల ఇన్నాళ్ళకు ఫలిస్తోంది. అందులోనూ ‘డర్టీపిక్చర్’, ‘కహానీ’ లాంటి సినిమాల ద్వారా జాతీయ స్థాయిలో అందరి దృష్టీనీ ఆకర్షించిన విద్యాబాలన్ హీరోయిన్‌గా నటించడం సంచలనవార్తే. మొన్న ‘కొచ్చాడయాన్’లో దీపికాపదుకొనే, నిన్న ‘లింగ’లో బాలీవుడ్ తార సోనాక్షీ సిన్హాతో స్టెప్పులేసిన రజనీ ఈసారి ఈ ‘పాలక్కాడ్ పొన్ను’తో అలరిస్తారన్న మాట. ఇంట్లో తమిళ, మలయాళాలను కలగలిపి మాట్లాడే విద్యాబాలన్‌కు రజినీతో నటించడం సరికొత్త అనుభవం... ఆనందం కూడా.
.jpg)
