బాలీవుడ్ కండల వీరుడు సల్మాన్ ఖాన్ కు కష్టాలు ఇంకా పూర్తిగా తీరలేదు. గురువారం హిట్ అండ్ రన్ కేసులో నిర్దోషిగా ప్రకటిస్తూ ముంబై హైకోర్టు తీర్పు వెలువరించిన విషయం తెలసిందే. అయితే ఈ కేసులో సల్మాన్ ను వదిలే ప్రసక్తే లేదని, మరోసారి కోర్టులో అప్పీల్ చేయాలని మహారాష్ట్ర ప్రభుత్వం నిర్ణయించినట్టు తెలుస్తోంది. తామింకా తీర్పు కాపీని చూడలేదని, తీర్పును పరిశీలించిన తరువాత ఏం చేయాలన్నది నిర్ణయిస్తామని మహారాష్ట్ర ముఖ్యమంత్రి దేవేంద్ర ఫడ్నవీస్ వెల్లడించారు. తదుపరి ఎటువంటి చర్యలు తీసుకోవాలన్న విషయమై న్యాయ నిపుణుల సలహా కోరనున్నట్టు ఆయన తెలిపారు.
కాగా, ఈ కేసులో తమకు అన్యాయం జరిగిందని బాధితుడు అబ్దుల్లా వాపోయాడు. పై కోర్టుకు వెళతారా? అని మీడియా ప్రశ్నించగా, కోర్టుల్లో అపీలు చేసుకుంటూ తిరిగేంత డబ్బేవుంటే, తాము ఫుట్ పాత్ లపై ఎందుకు నిద్రిస్తామని ప్రశ్నించాడు. తాము శిక్ష కన్నా నష్ట పరిహారాన్నే కోరుతున్నామని అన్నాడు. కాగా, సల్మాన్ నిర్దోషిత్వం పట్ల బాలీవుడ్ హర్షం వ్యక్తం చేసింది. పలువురు నిర్మాతలు, హీరో హీరోయిన్లు సల్మాన్ కు అభినందనలు తెలుపుతూ ట్వీట్లు చేస్తున్నారు.
.jpg)
