హెచ్ఐవీ ఉందని చిన్నారిని గెంటేశారు

హెచ్ఐవీ సోకిన వ్యక్తుల పట్ల వివక్షత ప్రదర్శించవద్దని, వారిని సామాన్య పౌరులుగానే చూడాలని నేతల దగ్గరి నుంచి సెలబ్రిటీల దాకా మొత్తుకుంటున్నప్పటికీ అమానుష ఘటనలు చోటుచేసుకుంటూనే ఉన్నాయి. హెచ్ఐవీ పాజిటివ్ ఉందనే కారణంగా అభం శుభం తెలీని ఓ చిన్నారిని స్కూలు నుంచి గెంటేశారు. సమాజం తలదించుకునే రీతిలో జరిగిన ఈ ఘటన పశ్చిమబెంగాల్ లో చోటుచేసుకుంది. కోల్ కతా అతి సమీపంలో పైగా ఓ ప్రభుత్వ పాఠశాలలో ఈ అవమానీయమైన ఘటన జరగటం శోచనీయం.

ఒకటో తరగతి చదువుతున్న ఆ చిన్నారిని తోటి విద్యార్థులు, వారి తల్లిదండ్రులు సూటిపోటీ మాటలతో బాధపెడుతున్నా పాఠశాల సిబ్బంది ఏ మాత్రం అడ్డుకోలేదు. పైగా, మళ్లీ స్కూలుకు రావద్దంటూ ఆ చిన్నారిని తరిమేశారు. వాస్తవానికి తనకు, తన కుమారుడికి వ్యాధి ఉన్న సంగతి స్కూలు యాజమాన్యానికి ఆ చిన్నారి తల్లి ముందే తెలిపింది. అంతేకాదు, ఎయిడ్స్ పై అవగాహన కల్పించే సంస్థలో తాను పనిచేస్తున్నట్టు కూడా చెప్పింది. అప్పుడు అభ్యంతర పెట్టని స్కూలు యాజమాన్యం, ఆ తర్వాత నిర్దాక్షిణ్యంగా ప్రవర్తించింది. అయితే, ఇతర విద్యార్థుల తల్లిదండ్రులు డిమాండ్ చేయడం వల్లే తాము ఈ నిర్ణయానికి వచ్చామని యాజమాన్యం చెబుతోంది. జరిగిన ఘటనపై విద్యార్థి తల్లి తీవ్ర అభ్యతరం తెలిపింది. దీంతో స్థానిక నేతలు ఎవరైనా కలుగజేసుకుని చిన్నారికి న్యాయం చేయాలని కోరుతోంది.