ఓవైపు ఎలాగైనా హైదరాబాద్ పై పట్టుసాధించుకోవాలని అధికార పక్షం ఆపరేషన్ ఆకర్ష్ తో పావులు కదుపుతుంటే, గ్రేటర్ ఎన్నికలో కనీసం సీట్లు దక్కించుకోవాలన్న ప్రయత్నంలో కాంగ్రెస్ ఉన్నట్లు తెలుస్తోంది. ఎలాగైనా సరే గ్రేటర్ హైద్రాబాద్ మహానగర ఎన్నికలలో గులాబీ దళానికి గట్టి పోటీఇవ్వాలన్న యోచనలో ఆ పార్టీ ఉంది. అయితే అందు కావాల్సిన బలమైన అభ్యర్థులు ఒక్కోక్కరుగా టీఆర్ఎస్ లోకి వలస వెళ్తుంటే మింగుడు పడని పరిస్థితిలో ఉంది. దీంతో సెంటి మెంట్ ఫ్లాన్ తోనైనా సీట్లు గెలుచుకోవాలన్న యోచనలో హస్తం ఉంది.
దివంగత నటుడు శ్రీహరి సతీమణి శాంతిని ఈ ఎన్నికల్లో నిలపాలన్న ఆలోచనలో కాంగ్రెస్ ఉందట. నిజానికి ఆయన ఉన్న సమయంలో 2014 ఎన్నికల బరిలో కూకట్ పల్లి నియోజకవర్గం నుంచి కాంగ్రెస్ తరపున పోటీచేయించాలని భావించింది. అయితే హఠాన్మరణంతో ఆ సీటును వేరే వారికి కేటాయించారు. సేవా కార్యక్రమాల్లో ముందుండే వ్యక్తిగా శ్రీహరి కి జనాల్లో మంచి పేరు ఉంది. దీంతో ఇప్పుడు ఆయన పేరు మీద ఆయన భార్యను ఎన్నికల్లో దించాలని పార్టీ భావిస్తోంది. మరోవైపు టీఆర్ఎస్ కూడా ఆమెను ఆకర్షించేందుకు పెద్ద సమయం ఏం అక్కర్లేదని పలువురు చెబుతున్నారు. శ్రీహరితో మంచి రిలేషన్ షిప్ ఉన్న తలసాని లాంటి వాళ్లు తలుచుకుంటే ఆమెను టీఆర్ఎస్ లోకి తీసుకోవటం పెద్ద కష్టమేమీ కాదని వారు అభిప్రాయపడుతున్నారు. దీనికి తోడు ఇటీవల ఆయన విగ్రహావిష్కరణను టీఆర్ఎస్ నేతలే దగ్గరుండి మరీ చేశారు. దీంతో ముందు ఆమెను పార్టీలోకి ఆహ్వానించి ఆపై గ్రేటర్ ఎన్నికల్లో నిలపాలన్న ఆలోచనలో టీఆర్ఎస్ కూడా ఉన్నట్లు తెలుస్తోంది. మరీ అందుకు ఆమె ఒప్పుకుంటుందా లేదా అన్నది తేలాల్సి ఉంది.
.jpg)
