కాంగ్రెస్ గులాబీ నేతల మధ్య మాటల వార్ కట్టలు తెంచుకుంటుంది. తెలంగాణ ఇచ్చినా పార్టీకి ఏ మాత్రం లాభం చేకూరకుండా పోయిందన్న మనోవేదన ఓవైపు, భవిష్యత్ లో అసలు పార్టీకి భవితవ్యం లేకుండా పోతుందనే భయంతో అధికార పక్షం పై విరుచుకుపడుతున్నారు. సహజంగానే అది అధికార పక్షానికి మండేలా చేసింది. దీంతో వారు కూడా ఎదురు దాడికి సిద్ధమైపోయారు.
తెలంగాణ వ్యాప్తంగా రైతుల ఆత్మహత్యలు ఎక్కువ కావటంతో దానికి ఆయుధంగా చేసుకుని అధికార పక్షం పై విరుచుకుపడాలని కాంగ్రెస్ భావించింది. ఈ క్రమంలో నల్లగొండ కు చెందిన కాంగ్రెస్ సీనియర్ నేతలు కోమటిరెడ్డి వెంకట్ రెడ్డి, ఆయన సోదరుడు రాజగోపాల్ రెడ్డి సీఎం కేసీఆర్ పై మాటల తూటాలు పేల్చారు. ప్రతిగా పెద్దపల్లి ఎంపీ బాల్క సుమన్ వారిపై ఫైరయ్యాడు. కాంగ్రెస్ హయాంలో కోమటిబ్రదర్స్ ఎక్కడెక్కడ ఏం ఏం చేశారో, ఏ ప్రాజెక్టులో ఎంత మేర కమీషన్లు బొక్కారో తన దగ్గర మొత్తం చిట్టా ఉందని ఆయన అంటున్నారు. మొత్తం బయటపెట్టమంటారా అంటూ కోమటి బ్రదర్స్ కి సవాల్ విసిరాడు. రైతుల ఆత్మహత్యల నివారణకు ఎంపీలు, ఎమ్మెల్యేలంతా కలిసి చర్చించుకోవాలని అనుకుంటున్నామని, దీనికి ప్రతిపక్షాలు కూడా కలిసి రావాలని ఆయన పిలుపునిచ్చారు. అసలు కాంగ్రెస్ ప్రభుత్వం రైతులకు ఏం చేసిందని ఇప్పుడు ఆత్మహత్యలపై అతిగా స్పందిస్తున్నారని ఆగ్రహం వ్యక్తంచేశాడు.
.jpg)
