కాంగ్రెస్ గూటిని వీడి టీఆర్ఎస్ లో చేరేందుకు పలువురు నేతలు ఇప్పుడు రెడీ అవుతున్నారు. వీరిలో సీనియర్లే ఎక్కువగా ఉండటం విశేషం. ఈ విషయాన్ని స్వయంగా సీనియర్ నేత అయిన డి.శ్రీనివాస్ ప్రకటించటం విశేషం. బుధవారం తెలంగాణ ముఖ్యమంత్రి కేసీఆర్ తో భేటీ అనంతరం ఆయన మీడియాకు ఈ విషయాన్ని వెల్లడించారు. తొలుత జ్వరంతో ఉన్న కేసీఆర్ ను పరామర్శించేందుకు వచ్చానన్న డీఎస్ తర్వాత మాట మార్చారు. పార్టీలో చేరే విషయాన్ని త్వరలోనే ప్రకటిస్తానని, అంతేకాదు తనతోపాటు మరికొందరు సీనియర్లు పార్టీలో చేరతారని ఆయన తెలిపారు. వారిలో దానం నాగేందర్ తోపాటు మరో సీనియర్ నేత సుదర్శన్ రెడ్డి ఉన్నట్లు సమాచారం అందుతోంది. ఎమ్మెల్సీ ఎన్నికల్లో తనకు ప్రాధాన్యత ఇవ్వకపోవటంతో డీఎస్ బహిరంగంగానే తన అసంతృప్తిని వెల్లగక్కారు. ఈ మేరకు పార్టీ అధినేత్రి సోనియా గాంధీకి ఆయన ఓ లేఖ కూడా రాశారు. ఎన్నో ఏళ్లుగా పార్టీకి సేవలందిస్తున్న తమను పురుగుల కంటే హీనంగా చూడటం దారుణమని ఆయన లేఖలో పేర్కొన్నారు. గత నాలుగు రోజులుగా ఆయన గులాబీ తీర్థం పుచ్చుకుంటారని వార్తలు వచ్చినప్పటికీ అవన్నీ పుకార్లే అని పార్టీ శ్రేణులు కొట్టిపారేస్తున్నాయి. ఇక ఇప్పుడు ఆయన ప్రకటనతో టీఆర్ఎస్ లో చేరటం దాదాపు ఖరారైంది.
.jpg)
