బొగ్గు అనే ఘనపదార్ధానికి మసి అంటించే దుర్గుణం కలదు. ఈ బొగ్గు తన పూర్వాశ్రమంలో నిప్పు అనే పేరుతో వెలసిల్లుతుండగా ముట్టిన మహానుభావున్ని కాల్చే మరో దుర్గుణం కలిగి ఉండేది. అందుచేత విజ్ఞులు, నూటయాభై సినిమాలు తీసినా, ముఖ్యమంత్రులు మాజీలయినా తలలు పండిన ప్రభుత్వాధికారులయిననూ ఒళ్లు దగ్గిర ఉంచుకుని బొగ్గు గారితో జాగరూకతో ఉండవలెను.
గతంలో మౌనమోహనసింగం గుహలోకి బొబ్బిలి జూలు విదుల్చుకుని విసవిసా అంగలేసుకుంటూ ప్రవేశించి పద్ధతీ పాడూ లేకుండా స్ర్కీ నాగు కమిటీని బేఖాతరు చేస్తూ ఫైల్సు నడపడం ఏం బావోలేదు అని గుర్రుమన్న వాస్తవం కొద్ది మందికి మాత్రం తెలిసిన యదార్థం.
కథ క్లయిమాక్సుకు వచ్చి సింగం గారు ఇలా మౌనవ్రతం పాటిస్తేకుదరదు. బోనెక్కి నోరు విప్పితే నిజాలు వెల్లడికాగలవనే వార్త ప్రముఖంగా సందడి చేస్తోంది. సందట్లో సడేమియా అన్నట్టు సోమిరెడ్డి చంద్రమోహన రెడ్డి గమ్మున ఉండలేక దీన్ని తీవ్రంగా ఖండిస్తూ నోరులేని సింగాన్ని కాదు అసలు సూత్రధారి, మాలవిరాట్టు పెద్దమ్మని రంగంలో దించితే గాని రంగుపడదు అని ప్రకటించేరు.
బొగ్గుల కుంపటి రాజేసుకుని బువ్వవండు కోవచ్చు, కలి కాగవచ్చు, జొన్నపొత్తులు కాల్చుకోవచ్చు, సాంబ్రాణి ధూపం వేసుకోవచ్చు, ఛాయ్ భీ తాగొచ్చు. అంతేగాని కుంపటి మీద కూర్చోవచ్చా.
.jpg)
